Padčas CHČS haścinicy byli zahružanyja na 82%
Za čas praviadzieńnia čempijanatu śvietu pa chakiei ahulnaja zahruzka staličnych haścinic, pavodle papiarednich danych, skłała kala 82%, paviedamiŭ BiełaPAN namieśnik načalnika DU «Upraŭleńnie bytavoha i haściničnaha absłuhoŭvańnia nasielnictva Minharvykankama» Juryj Natyčka.
Pavodle jaho słoŭ, padčas chakiejnaha ČS-2014 adznačałasia dva pikavyja pieryjady zahruzki haścinic. «Z 8 pa 11 maja zahruzka składała 96-97%, z 24 pa 26 maja — 87%», — adznačyŭ Natyčka. Da praviadzieńnia čempijanatu śvietu zahruzka staličnych haścinic składała 50—55%. Pa vynikach hoda hety pakazčyk čakajecca na ŭzroŭni 40—43%.
«Adsutnaść luboj padziei pryvodzić da spadu. Akramia taho, z 31 maja ŭ nas viartajecca vizavy režym, tamu ŭsio budzie tak, jak zaŭsiody. Mahčyma, niejkaja cikavaść da Biełarusi prajavicca paśla čempijanatu, ale zrazumieła, što takaja kolkaść zamiežnikaŭ nie budzie da nas pryjazdžać štomiesiac», — adznačyła ŭ kamientary dla BiełaPAN načalnik adździeła karparatyŭnaha i padziejnaha turyzmu centra pa sanatorna-kurortnaj pracy «Centrkurort» Volha Harbačeŭskaja.
Kab utrymać vysokuju płanku pa zahruzcy hatelaŭ, jakaja była dasiahnuta padčas čempijanatu, jana rekamienduje «pravodzić bolš roznych padziejnych mierapryjemstvaŭ i admianić vizy dla zamiežnych turystaŭ».
Jašče adnym sposabam pryciahnuć klijentaŭ śpiecyjalisty ličać źnižeńnie cen na haściničnyja numary. «Jany ŭžo pamianšajucca. Pa vynikach 2013 hoda siaredniaja cana pa horadzie ŭpała na 15%, da kanca hetaha hoda cana źnizicca jašče na 15%», — adznačyŭ Natyčka.
Dla absłuhoŭvańnia haściej čempijanatu było zadziejničana 43 haścinicy, 14 ź jakich byli pabudavanyja śpiecyjalna da spartovaha pieršynstva.