«Barysaŭčanka» pieradała vitańnie Ryhoraviču z akopaŭ pad Słavianskam
Maładaja žančyna Natalla Krasoŭskaja z Barysava raspaviała rasijskim žurnalistam, jak jana pačała vajavać na baku sieparatystaŭ u Słaviansku Danieckaj vobłaści.
U adroźnieńnie ad mnohich inšych bajevikoŭ tak zvanaj «DNR» jana nie chavała svoj tvar pierad telekamieraj.
Barysaŭčanka Natalla Krasoŭskaja raspaviała, što vajuje ŭ vakolicach Słavianska, u vioscy Siamionaŭcy na baku ŭzbrojenych sieparatystaŭ.
Dziaŭčyna nosić kamuflažnuju formu z našyŭkaj u vyhladzie aficyjnaha dziaržaŭnaha ściaha Biełarusi i hieorhijeŭskaj stužkaj. Na rukavie jaje formy napisana «RB».
Natala raspaviała karespandentam rasijskaj «Komsomolskoj pravdy», što na baku apałčencaŭ jość jašče chłopcy i dziaŭčaty ź Biełarusi, pakazała svoj biełaruski pašpart, a taksama pieradała pryvitańnie svaim rodnym i prezidentu Biełarusi, jakoha dziaŭčyna nazyvaje «Ryhoravič».
«Ja pryjechała, tamu što časam biaździejańnie bolš motašnaje, čym dziejańnie. Mnie nadakučyła padtrymlivać apałčeńnie praź internet — «Ukantakcie» i «Fejsbuku». Ja pryjechała siudy 5 maja. A 7 maja ja była ŭžo ŭ Słaviansku. Ja naradziłasia ŭ Biełarusi. Vyrasła ŭ Biełarusi. I da pryjezdu ŭ Słaviansk ja žyła ŭ Biełarusi, u Minskaj vobłaści, horadzie Barysaŭ, na vulicy Trusava. Ja nie bajusia pakazvać svoj tvar i pašpart, bo ŭ bok biełaruskaj miažy ja pajedu tolki tady, kali ŭsie pamiežnyja zastavy buduć zaniatyja apałčencami. U Siamionaŭcy ja ŭžo kala tydnia. Raniej ja była ŭ inšym atradzie, ale siudy źbirali dobraachvotnikaŭ i ja pryjechała.
Chaču pieradać pryvitańnie majmu baćku. Kali ja viarnusia, my vypjem ź im harełki, jak dva mužyki. Ja chaču pieradać pryvitańnie majoj mamie i paprasić jaje mianie zrazumieć. Ja chaču pieradać pryvitańnie barysaŭčanam i skazać: «Voś ja». Ja chaču pieradać pryvitańnie «baćku» Ryhoraviču i skazać: «Baćka, tvaje hramadzianie na hetym baku. Na ŭsiaki vypadak, kab ty viedaŭ, Ryhoravič.
Dziaŭčyny, chłopcy — nas nichto nie adpraŭlaŭ, my pryjechali siudy sami. Ź Biełarusi tut nie ja adna. Ja prosta chaču, kab ty, Ryhoravič, heta viedaŭ», — skazała Natalla na kamieru žurnalistam «Komsomolskoj pravdy».
Ukrainskaja prakuratura pryznała «Danieckuju narodnuju respubliku», za jakuju vajuje Natalla terarystyčnaj arhanizacyjaj.