Adna ź viadučych sistem elektronnych płaciažoŭ u śviecie PayPal prychodzić u Biełaruś
PayPal, adna ź viadučych sistem elektronnych płaciažoŭ u śviecie, abviaściła ab płanach pa zapusku svaich pasłuh na 10 novych rynkach, u tym liku ŭ Biełarusi.
Jak havorycca ŭ paviedamleńni PayPal, heta aznačaje, što ŭ bližejšyja dni žychary Biełarusi zmohuć adčynić rachunki ŭ PayPal i pačać ździajśniać płaciažy na miljonach sajtaŭ u internecie pa ŭsim śviecie bieź nieabchodnaści ŭvodu dadzienych bankaŭskich kart. U ciapierašni čas sistema PayPal dastupnaja ŭ 203 krainach.
«Novyja technałohii zdymajuć pieraškody na šlachu da hłabalnaha handlu, ale ludzi bajacca daviarać čužym veb-sajtam dadzienyja svaich kredytnych abo debietavych kart, uvodziačy rekvizity ŭ akienca nieviadomaha resursu, jaki znachodzicca ŭ inšaj krainie», — adznačyŭ Rupiert Kili, vice-prezident PayPal ŭ Jeŭropie, na Blizkim Uschodzie i ŭ Afrycy. — Ździajśnieńnie ža płaciažoŭ z dapamohaj PayPal — heta spakoj dla kupcoŭ, bo im nie treba bolš ŭvodzić finansavuju infarmacyju pry kožnaj tranzakcyi».
«My rady, što siońnia žychary Biełarusi atrymlivajuć zručnaje i prostaje rašeńnie dla ździajśnieńnia pakupak praź internet. My pastajanna pracujem nad pošukam novych pierśpiektyŭnych rynkaŭ i nam vielmi radasna kožny dzień čytać pra toje, jak ludzi pa ŭsim śviecie vitajuć źjaŭleńnie PayPal ŭ novych krainach, bo my robim dla hetaha ŭsio mahčymaje», — adznačyŭ rehijanalny dyrektar PayPal u Rasii i Biełarusi Uładzimir Maluhin.