Nacbank: Pamier źniešniaha doŭhu biełaruskich bankaŭ dasiahnuŭ niebiaśpiečnaha ŭzroŭniu
Pavodle acenki Nacyjanalnaha banka Biełarusi, vieličynia źniešniaha doŭhu bankaŭskaha siektara krainy dasiahnuła patencyjalna niebiaśpiečnaha ŭzroŭniu.
«Pamier vałavoha źniešniaha doŭhu bankaŭskaha siektara Respubliki Biełaruś adnosna sukupnych pasivaŭ bankaŭ i zołatavalutnych reziervaŭ Nacyjanalnaha banka dasiahnuŭ patencyjalna niebiaśpiečnaha ŭzroŭniu», — zajaviŭ načalnik hałoŭnaha ŭpraŭleńnia bankaŭskaha nahladu Nacbanka, člen praŭleńnia Dźmitryj Łapko na pašyranym pasiadžeńni praŭleńnia Nacyjanalnaha banka ŭ kancy krasavika. Tekst jaho vystupleńnia publikuje «Bankovskij viestnik», jaki vydajecca Nacbankam.
Da inšych faktaraŭ, jakija niehatyŭny ŭpłyvajuć na ŭstojlivaść bankaŭskaha siektara, Łapko adnios situacyju ŭ Rasii. «Źmiena ahulnaekanamičnaj situacyi ŭ Rasijskaj Fiederacyi moža abmiežavać mahčymaści pa refinansavańni źniešniaj zapazyčanaści biełaruskimi bankami šlacham vykarystańnia jak maciarynskaha kapitału, hetak i sindykavanych kredytaŭ», — skazaŭ člen praŭleńnia Nacbanka.
Na jaho dumku, pieravyšeńnie karotkaterminovych źniešnich abaviazacielstvaŭ nad dastupnymi bankam likvidnymi aktyvami ŭ zamiežnaj valucie «ŭ vypadku realizacyi niehatyŭnaha scenaryja moža pryvieści da deficytu likvidnaści ŭ zamiežnaj valucie dla bankaŭ».
Pavodle źviestak Nacbanka, valutny kredytny partfiel bankaŭ, vieličynia jakoha składaje 15,5 młrd. dołaraŭ ZŠA, charaktaryzujecca vysokaj stupieńniu kancentracyi — treciaja častka valutnych kredytaŭ usiaho bankaŭskaha siektara prypadaje na 20 najbujniejšych pazyčalnikaŭ.
Pry hetym u Nacbanku kanstatujuć, što apošnim časam adbyvajecca značnaje paharšeńnie klučavych finansavych pakazčykaŭ kredytaatrymalnikaŭ, u tym liku najbujniejšych.
«Z ulikam rostu składskich zapasaŭ daŭžnikoŭ ź vialikaj dolaj vierahodnaści možna mierkavać, što pradpryjemstvam realnaha siektara ekanomiki spatrebicca dadatkovaje finansavańnie dla papaŭnieńnia abarotnych srodkaŭ, a značyć, u karotkaterminovaj pierśpiektyvie popyt na kredyty pieravysić abjom pahašeńnia raniej pryniatych abaviazacielstvaŭ z boku pazyčalnikaŭ», — zaznačyŭ Łapko.
Pavodle źviestak Nacbanka, na 1 studzienia 2014 hoda źniešni doŭh biełaruskich bankaŭ skłaŭ 8,2 młrd. dołaraŭ ZŠA (21% vałavoha źniešniaha doŭhu), pavialičyŭšysia za 2013 hod na 2 młrd. dołaraŭ ZŠA, abo na 32,3%. Najbujniejšymi kredytorami bankaŭskaha siektara Biełarusi źjaŭlajucca Rasija i Hiermanija, doli jakich u struktury zapazyčańniaŭ skłali 48,9% i 17,8% adpaviedna.