Złačyniec, jaki vykraŭ z bankaŭskich kartak bolš za miljard rubloŭ, pryhavorany da 10 hadoŭ pazbaŭleńnia voli
Sud Pieršamajskaha rajona Viciebska vynies pryhavor pa kryminalnaj spravie pa abvinavačańni hramadzianina Małdovy va ŭčynieńni złačynstvaŭ, praduhledžanych č. 1 art. 14, č. 4 art. 212, art. 352 KK.
Jak paviedamili ŭ Viarchoŭnym sudzie Biełarusi, abvinavačvany dvojčy 19 sakavika i ŭ noč na 15 červienia 2013 hoda sumiesna z hrupaj suajčyńnikaŭ, vykarystoŭvajučy zahadzia vyrablenyja padroblenyja płaciežnyja kartki, rekvizity jakich niekalkimi tydniami raniej byli skapijavany imi ž z mahnitnych pałos kartak paciarpiełych pry dapamozie skiminhavych pryład, ustanoŭlenych na kartapryjomniki bankamataŭ, sprabavali źniać hrašovyja srodki z rachunkaŭ hramadzian u bankamatach respubliki.
Ahulnaja suma hrašovych srodkaŭ, jakuju ŭdałosia vykraści złačyncam z rachunkaŭ paciarpiełych, skłała bolš za miljard rubloŭ. Vykradzienyja takim čynam hrošy bolšaści paciarpiełych byli viernuty bankami, klijentami jakich jany źjaŭlalisia.
Pakul pierad sudom adkazvaje tolki adzin abvinavačvany, astatnija saŭdzielniki znachodziacca ŭ vyšuku, dvoje ź ich zatrymany ŭ Rasii pa padazreńni va ŭčynieńni anałahičnych złačynstvaŭ.
Pryhavoram suda abvinavačvany pryznany vinavatym u zamachu na kradziež majomaści šlacham uviadzieńnia ŭ kampjutarnuju sistemu łžyvaj infarmacyi, spałučanaj ź niesankcyjanavanym dostupam da kampjutarnaj infarmacyi, učynienym paŭtorna, hrupaj asob pa papiaredniaj zmovie, u asabliva bujnym pamiery. Na padstavie č.1 art. 14 i č. 4 art. 212 KK jamu pryznačana pakarańnie terminam na dzieviać hadoŭ šeść miesiacaŭ pazbaŭleńnia voli z kanfiskacyjaj majomaści biez pazbaŭleńnia prava zajmać peŭnyja pasady ci zajmacca peŭnaj dziejnaściu, a taksama ŭ niesankcyjanavanym kapijavańni infarmacyi, jakaja zachoŭvajecca ŭ kampjutarnaj sistemie i na mašynnych nośbitach, što paciahnuła pryčynieńnie istotnaj škody, i na padstavie art. 352 KK jamu pryznačana pakarańnie ŭ vyhladzie hoda pazbaŭleńnia voli.
U adpaviednaści z č. 3 art. 72 KK pa sukupnaści złačynstvaŭ, šlacham častkovaha składańnia pryznačanych pakarańniaŭ, sudom kančatkova pryznačana abvinavačvanamu pakarańnie ŭ vyhladzie 10 hadoŭ pazbaŭleńnia voli z adbyvańniem pakarańnia ŭ papraŭčaj kałonii va ŭmovach uzmocnienaha režymu z kanfiskacyjaj majomaści biez pazbaŭleńnia prava zajmać peŭnyja pasady ci zajmacca peŭnaj dziejnaściu.
Pryhavor rajonnaha suda byŭ vyniesieny 10 červienia. Jon abskardžany ŭ kasacyjnym paradku.