Remba viartajecca
Silviestr Stałonie syhraje jašče ŭ adnoj častcy pra Remba. Jak paviedamili pradstaŭniki studyi Splendid Film rychtujecca da vychadu film «Remba-5».
Premjera stužki zapłanavanaja na 2015 hod. Hieroj piataj častki historyi pra Remba budzie zmahacca suprać mieksikanskaha narkakartela.
Stałonie (zorka «Remba» i «Roki») udzielničaŭ u stvareńni scenara. Akcior kaža, što praciah «Remba» - heta varyjant filma «Starym tut nie miesca».
Upieršyniu film «Remba» vyjšaŭ bolš za 30 hadoŭ tamu, u 1982. Jon byŭ źniaty pavodle ramana Devida Mareła «Pieršaja kroŭ» (1972 hod) i nazyvaŭsia amal anałahična «Remba: Pieršaja kroŭ». Pry biudžecie $ 15 młn karcina zarabiła bolš za $ 125 młn, a taksama suśvietnuju słavu. Na rolu Remba pretendavali akciory Al Pačyna, Džon Travołta, Dastyn Chofman i Klint Istvud, ale pa roznych pryčynach admovilisia. Stałonie chacieŭ za rolu Remba hanarar $ 3,5 młn, ale ŭ vyniku pahadziŭsia na $ 2 młn, jašče $ 1,5 młn jon atrymaŭ ad prakatu filma na telebačańni.
Pa siužecie, Džon Remba (vieteran vajny ŭ Vjetnamie) padarožničaje pa Amierycy, kab znajści svaich bajavych tavaryšaŭ. Padarožža pierapyniaje šeryf pravincyjnaha haradka, jaki nienavidzić vałacuhaŭ. Remba traplaje ŭ turmu pa iłžyvym abvinavačvańni, uciokaje i pomścić.
Užo ŭ 1985 hodzie vyjšaŭ praciah historyi - «Remba: Pieršaja kroŭ - 2». Treciaja častka «Remba» źjaviłasia ŭ 1988 hodzie. Paśla hetaha byŭ pierapynak u 20 hadoŭ. «Remba-4» vyjšaŭ na vialikija ekrany tolki ŭ 2008 hodzie. Stałonie nie tolki vykanaŭ hałoŭnuju rolu ŭ karcinie, ale i vystupiŭ u jakaści režysiora. Pry biudžecie ŭ $ 50 młn film sabraŭ u suśvietnym prakacie $ 113,2 młn.