Vox populi, abo Za što nie lubiać rasiejcaŭ
Piša Anatol Sidarevič
Niaŭžo, zdavałasia b, hetych łacinaamierykancaŭ, zachodnich jeŭrapiejcaŭ, hramadzianaŭ ZŠA chvaluje vynik matču pamiž kamandami Ałžyra i Rasii? Nie było ŭ hrupie N nivodnaj paŭdniova- i paŭnočnaamierykanskaj družyny, a bielhijcy, adzinaja zachodniejeŭrapiejskaja kamanda, zabiaśpiečyli sabie vychad u 1/16 finału čempijanatu śvietu jašče 22 červienia. Nie viedaju, kolki było ŭčora na toj arenie rasijanaŭ, ale ałžyrcaŭ — žmieńka. I ŭsio ž stadyjon nie byŭ spakojny, stadyjon chvalavaŭsia, stadyjon byŭ poŭny žarściaŭ.
Rasijanam patrebnaja była pieramoha. Ničyjny vynik aznačaŭ dla ich parazu. Kali Alaksandr Kakoryn zabiŭ miač u varoty ałžyrcaŭ, u rasijan źjaviłasia nadzieja. Zatoje amal uvieś stadyjon staŭ na bok ałžyrcaŭ. Amal usie zaŭziatary družna vitali bolš-mienš udały chod ałžyrskich futbalistaŭ i aśvistvali ataki rasijskich spartmienaŭ. Treba było bačyć i čuć entuzijazm dziasiatkaŭ tysiač mužčyn i žančyn, kali Isłam Ślimani hałavoj zabiŭ miač u varoty rasijskaj zbornaj i zraŭniaŭ lik — 1:1. Hety bajavy ničyjny vynik adkryŭ ałžyrcam darohu ŭ plej-of. Rasijanam ža paśla hetaha ŭdaru zastałosia adno — pakavać čamadany.
Na stadyjonie ŭ Kurycibie my pačuli vox populi — hołas narodu. Hołas salidarnaści.
Rasijcy, jakija ličać svaju ziamlu śviatoju, a siabie ledź nie narodam-bahanoscam, časta zadajuć pytańnie: za što nas nie lubiać? A voś za heta i nie lubiać – za ahresiŭnaść, za palityku pahrozaŭ, šantažu, za niaŭmieńnie i niežadańnie cyvilizavana pavodzić siabie ŭ cyvilizavanym śviecie, za kryŭdy, učynienyja słabiejšym. Družna padtrymlivajučy kamandu Ałžyra, aśvistvajučy kamandu Rasii, zaŭziatary na arenie «Bajšada» vykazvali tym samym pratest suprać ahresiŭnaj palityki Maskvy i salidarnaść z tymi, chto supraćstaić hetaj ahresii.