U rublach…. u rasterminoŭku: jak ministr Snapkoŭ vykupiŭ u ŽREA apartamienty koštam $500 tysiač
U papiarednim numary «Našaj Nivy» (№24 ad 25 červienia) my raskazvali pra elitnaje žyllo ŭ Drazdach na vulicy Pijanierskaj.
Čatyry šmatkvaternyja damy byli pabudavanyja ŭ kancy 2000-ch, zabudoŭščykam byŭ «Trest Prambud». Elitnyja kvatery pradavalisia pa kamiercyjnaj canie, tamu ich haspadarami pieradusim stanavilisia biznesmieny.
Našu ŭvahu pryciahnuli dźvie kvatery. Jak paviedamlałasia raniej, u kastryčniku 2010 śpikier pałaty pradstaŭnikoŭ Uładzimir Andrejčanka zahadkavym čynam pryvatyzavaŭ trochpakajoŭku płoščaj 114 m2 pa adrasie Pijanierskaja, 7.
Adnak siarod haspadaroŭ jość jašče čynoŭnik pry vysokaj pasadzie. Adna z samych vialikich kvater u domie — čatyrochpakajovyja apartamienty płoščaj 134 m2 — naležyć ministru ekanomiki Mikałaju Snapkovu.
Situacyja ź jahonym žyllom nie mienš zabłytanaja, čym u historyi Andrejčanki.
Damy pa Pijanierskaj majuć utulny ŭnutrany dvoryk. Na fota: vid z padjezda Mikałaja Snapkova.
U studzieni 2009 hoda Snapkoŭ, na toj momant 40-hadovy vicehubiernatar Mahiloŭskaj vobłaści, pierajazdžaje ŭ Minsk. Jaho paklikali pracavać namieśnikam kiraŭnika Administracyi prezidenta. Darečy, pavodle ŭkaza «Ab stvareńni śpiecyjalnaha słužbovaha žyllovaha fonda», heta nie taja pasada, na jakoj jon adrazu musić atrymać słužbovuju kvateru.
Snapkova prapisali na terytoryi rezidencyi prezidenta «Drazdy», i jon pačaŭ šukać, jak vyrašyć svajo žyllovaje pytańnie.
I ŭžo praz paŭhoda pracy Snapkoŭ nabyŭ ahromnistuju čatyrochpakajoŭku ŭ domie na vulicy Pijanierskaj, 7.
Pavodle vypiski z Adzinaha dziaržaŭnaha rehistra nieruchomaści, u lipieni 2009 hoda čynoŭnik uziaŭ elitnaje žyllo ŭ ipateku.
U hetym nie było b ničoha dziŭnaha: haspadary dziasiatkaŭ darahich kvater u Minsku kuplali nieruchomaść, papiarednie ŭziaŭšy valutu pad pracent u banku.
Pakul jany całkam nie viernuć hrošy, pravaŭłaśnikam kvatery ličycca bank.
Ale ŭ Snapkova situacyja zusim inšaja. Pa-pieršaje, ipateku jon afarmlaŭ nie ŭ banku, a ŭ… ŽREA. Jak paznačana ŭ dakumientach, pravaŭłaśnikam jahonych apartamientaŭ pakul što źjaŭlajecca ŽREA Centralnaha rajona Minska.
Pa-druhoje, kupla dla Snapkova była aformlenaja rasterminoŭkaj na piać hadoŭ. Umovy jahonaj damovy nieviadomyja, ale «rasterminoŭka» zvyčajna va ŭmovach biełaruskaj inflacyi — heta atrakcyjon niabačanaj ščodraści.
Košt ipateki składaŭ 320 miljonaŭ rubloŭ. U pačatku vypłat, u lipieni 2009, kurs byŭ kala 3000 rubloŭ. A ciapier jon užo 10200. Adčuvajecie roźnicu?
Užo ŭ hetym miesiacy Snapkoŭ raźličycca z ŽREA i stanie paŭnavartasnym haspadarom svaich apartamientaŭ.
* * *
Mikałaj Snapkoŭ naradziŭsia ŭ 1969 u Mahilovie. Zakončyŭ Biełaruskuju sielskahaspadarčuju akademiju (1991), Akademiju kiravańnia (2001). U 1990—1994 pracavaŭ ekanamistam, staršym ekanamistam, buchhałtaram u kałhasach Mahiloŭščyny i Hrodzienščyny. U 1994—1996 — ekanamist, hałoŭny ekanamist, namieśnik kiraŭnika ŭ drybinskim adździaleńni «Biełahraprambanka», u 1996—2000 — namieśnik staršyni Horackaha rajvykankama. U 2000—2009 — načalnik finansavaha ŭpraŭleńnia, a paśla namieśnik staršyni Mahiloŭskaha abłvykankama. U 2009 — namieśnik kiraŭnika Administracyi prezidenta, sa śniežnia 2009 — ministr ekanomiki.
* * *
«Mikałaj Snapkoŭ — čałaviek novaj hienieracyi. Moža, jon i atrymlivaje zaŭvahi praz toje, što jaho prapanovy i idei nie zusim kamfortna kładucca na matrycu ciapierašnich ekanamičnych asnoŭ. Ale jaho razvažańni prymušajuć dumać ludziej, jakija zvyklisia pracavać u raniej isnujučych umovach». Premjer-ministr Michaił Miaśnikovič
* * *
Hetaja publikacyja NN, jak i raniejšyja na hetuju temu, hruntujecca na adkrytych krynicach.