Makiej: Jak moža stavicca narmalny čałaviek da taho, što adbyvajecca va Ukrainie?
U padziejach va Ukrainie na pieršy płan vychodziać pytańni rehijanalnaj i mižnarodnaj biaśpieki.
Ab hetym ministr zamiežnych spraŭ Biełarusi Uładzimir Makiej zajaviŭ u intervju prahramie «Tydzień» telekanała «STB».
«Jak moža stavicca narmalny čałaviek da taho, što adbyvajecca va Ukrainie? Viadoma ž, niehatyŭna. Prablema ŭ tym, što situacyja va Ukrainie ŭžo stanovicca nie tolki ŭnutryŭkrainskaj i navat nie rehijanalnaj, jana vyjšła ŭžo na mižnarodny ŭzrovień. Ja maju na ŭvazie apošnija padziei, źviazanyja z padzieńniem małajzijskaha samalota, jaki byŭ źbity nad terytoryjaj Ukrainy. Pytańni i rehijanalnaj, i mižnarodnaj biaśpieki vychodziać na pieršy płan», - zajaviŭ ministr.
«Liču, što heta absalutna zrežysiravanaja kampanija, za jakoj stajać ekanamičnyja, u pieršuju čarhu enierhietyčnyja, a taksama palityčnyja intaresy. Rana ci pozna historyja ŭsio rasstavić pa svaich miescach», - padkreśliŭ Uładzimir Makiej.
«Našy padychody da padziej va Ukrainie zaŭsiody byli vyraznymi i zrazumiełymi. My vystupali za toje, kab praz dyjałoh, uzajemadziejańnie ŭsich uklučanych u hety praces sił va Ukrainie byli ŭstanoŭleny mir, spakoj i stabilnaść. Takija padychody i zastajucca, — skazaŭ kiraŭnik źniešniepalityčnaha viedamstva. — Dla nas Ukraina — vielmi važny handlova-ekanamičny partnior. Ale jašče i bracki narod. My chacieli b, kab tam jak maha chutčej situacyja stabilizavałasia i kab my mahli ŭ narmalnym duchu pradaŭžać raniejšaje supracoŭnictva va ŭsich śfierach našaha ŭzajemadziejańnia».
Uładzimir Makiej prakamientavaŭ toj fakt, što ŭ suviazi z ukrainskimi padziejami krainy NATA aktyŭna ŭzmacniajuć vajennuju prysutnaść u niepasrednaj blizkaści ad Biełarusi.
«Znoŭ-taki, naša reakcyja adnaznačnaja. Kali pahladzieć na historyju ŭzajemaadnosin NATA ź dziaržavami postsavieckaj prastory, to my zaŭsiody čuli z boku NATA zapeŭnieńni, što NATA nie ŭjaŭlaje saboj nijakaj pahrozy, što vystupaje za mir i stabilnaść u Jeŭropie i ŭ śviecie ŭ cełym, - adznačyŭ ministr. - Ale pahladzicie na fakty. U svoj čas Harbačovu davali zapeŭnieńni, što NATA nie budzie ruchacca na ŭschod, i rabili inšyja zajavy. U vyniku padmanuli. Pry Jelcynie taksama mnohija palityki hladzieli praz ružovyja akulary na ŭzajemaadnosiny z NATA. U vyniku adbyłosia toje, što NATA ŭščylnuju padyšło da hranic Biełarusi, Rasii, da inšych dziaržaŭ».
«A ciapier padziei va Ukrainie vykarystoŭvajucca niekatorymi krainami dla taho, kab pad vyhladam abarony ich biaśpieki raźmiaścić u siabie na terytoryi niejkija hrupoŭki NATA, dadatkovyja samaloty i h.d. i da t.p.
My ŭsio heta cudoŭna bačym, adsočvajem. I, zrazumieła, u hetaj situacyi reakcyja budzie adekvatnaj», - padkreśliŭ Uładzimir Makiej.
U suviazi z hetym ministr nahadaŭ, što ŭ Biełarusi jość adpaviednaja damoŭlenaść u Sajuznaj dziaržavie ŭ vajennaj śfiery, kraina źjaŭlajecca ŭdzielnicaj ADKB. «My budziem uvažliva nazirać za dalejšym pieramiaščeńniem NATA na ŭschod, i heta pytańnie budzie ŭ poli zroku kiraŭnikoŭ dziaržaŭ ADKB i Sajuznaj dziaržavy. Viadoma ž, apošnija padziei ŭ rehijonie, u tym liku ruch NATA na ŭschod i raźmiaščeńnie hrupovak NATA ŭ niekatorych našych susiednich dziaržavach, nie sadziejničaje ŭmacavańniu biaśpieki ŭ rehijonie, dy i ŭ śviecie ŭ cełym», - reziumavaŭ kiraŭnik źniešniepalityčnaha viedamstva.