KDB raspačaŭ administracyjny praces ŭ dačynieńni da mahiloŭskich žurnalistaŭ
Kamitet dziaržaŭnaj biaśpieki padazraje mahiloŭskich niezaležnych žurnalistaŭ Alaksandra Burakova i Michaiła Aršynskaha ŭ supracoŭnictvie z zamiežnymi ŚMI biez akredytacyi.
na fota — Michaś Aršynski
Jak paviedamiŭ BiełaPAN Burakoŭ, jaho vyklikali pa telefonie ŭ aporny punkt milicyi na vulicy Budaŭnikoŭ, 7, dzie 18 žniŭnia major milicyi Rusłan Marozaŭ uziaŭ u jaho tłumačeńni adnosna siužeta, pakazanaha vosieńniu 2013 hoda na telekanale «Biełsat». U dakumientach milicyjaniera taksama jak asoba, u dačynieńni da jakoj raspačaty administracyjny praces, značycca Michaił Aršynski, što zajmajecca fota- i videazdymkaj.
«U videasiužecie havaryłasia pra žudasnyja ŭmovy žyćcia ludziej u domie № 4 pa vulicy Budaŭnikoŭ — u baraku niama prybiralni, hniłaja padłoha, stol moža zvalicca ŭ luby momant.
Paśla taho jak vyjšaŭ siužet, UKDB pa Mahiloŭskaj vobłaści praviało pravierku i ažyćciaviła apieratyŭna-vyšukovyja mierapryjemstvy — identyfikacyju asoby. Ludziam, jakija fihuravali ŭ siužecie, pakazvali fotazdymki, pa jakich jany pavinny byli apaznać mianie, apaznać Michaiła Aršynskaha. Ja prosta ździviŭsia, što KDB zajmajecca takoj łuchtoj», — zajaviŭ Burakoŭ, adznačyŭšy, što adkaznaściu zhodna z artykułam, na padstavie jakoha raspačataja sprava, moža być nie bolš jak štraf.
Žurnalist skazaŭ, što ŭžo šmat hadoŭ nie jeździć u Polšču i źjaŭlajecca fryłansaram, jaki maje svoj sajt i supracoŭničaje z roznymi vydańniami. Pavodle jaho słoŭ, u Marozava byli papiery sa spampavanymi ź internetu materyjałami, a ŭ dakumientach, što tyčacca pravierki, praviedzienaj śpiecsłužbaj, było zamazanaje proźvišča supracoŭnika KDB, jaki jaje pravodziŭ.
«Dastatkova cikava za ŭsim hetym nazirać, ale ŭsio-taki była praviedzienaja pravierka, raspačataja administracyjnaja sprava, KDB pieradaŭ u milicyju materyjały pravierki, jakaja pavinna niejak reahavać. Milicyja pakul vyklikaje nas i biare tłumačeńni», — skazaŭ niezaležny žurnalist.
«Cikava, što pravierka była praviedzienaja ŭ kastryčniku-listapadzie 2013 hoda.
Administracyjnaja sprava pavinna być razhledžanaja ŭ dvuchmiesiačny termin, a dalej zakančvajecca termin daŭniny. Nie viedaju, jakaja tut moža być pierśpiektyva», — adznačyŭ Burakoŭ.
Jon pakul nie źviazvaje pretenzii KDB da jaho z čymści, akramia, mahčyma, udziełu ŭ Mahiloŭskaj pravaabarončaj hrupie, jakaja zajmajecca pytańniami karalnaj psichijatryi. «U lubym vypadku ja nie liču, što heta taki mocny nacisk na mianie. I mianie vielmi ździŭlaje, što KDB za dziaržaŭnyja srodki takim zajmajecca», — skazaŭ Burakoŭ.