Ihar Kuźniacoŭ: Biełaruś zastajecca adzinaj krainaj u Jeŭropie, dzie nie ŭšanavana pamiać achviar stalinizmu
Biełaruś zastajecca adzinaj dziaržavaj siarod jeŭrapiejskich krain, dzie nie ŭšanavana pamiać achviar stalinizmu, zajaviŭ historyk Ihar Kuźniacoŭ 22 žniŭnia na bryfinhu, pryśviečanym pamiaci achviar aŭtarytaryzmu.
Mierapryjemstva prajšło napiaredadni Jeŭrapiejskaha dnia pamiaci achviar stalinizmu i nacyzmu (23 žniŭnia). Hety dzień byŭ zasnavany 2 krasavika 2009 hoda Jeŭrapiejskim parłamientam.
Kuźniacoŭ nahadaŭ, što sioleta spaŭniajecca 75 hadoŭ z momantu padpisańnia dahavora ab nienapadzieńni pamiž Hiermanijaj i SSSR taksama viadomaha jak pakt Mołatava — Rybientropa. «Prajšło ŭžo 75 hadoŭ, i zastajecca šmat sprečnych pytańniaŭ, ale, napeŭna, siońnia ŭžo nichto nie asprečvaje, što faktyčna Druhaja suśvietnaja vajna pačałasia nie 1 vieraśnia, kali pajšoŭ etap bajavych dziejańniaŭ, a 23 žniŭnia — mienavita z pakta ab nienapadzieńni», — skazaŭ historyk.
Jon padkreśliŭ, što «ŭ žyćci tady savieckaha i biełaruskaha naroda ŭ pryvatnaści» hety dakumient «adyhraŭ samuju trahičnuju rolu».
Kuźniacoŭ sa škadavańniem adznačyŭ, što dahetul «u Biełarusi, u adroźnieńnie ad usich jeŭrapiejskich krain, pamiaci achviar stalinizmu nie nadajuć uvahi». «Kali pamiać achviar nacyzmu ŭ Biełarusi ŭ niejkaj stupieni, ale nie ŭ poŭnaj miery, uviekaviečvajecca, to dla pamiaci achviar stalinizmu ŭ Biełarusi z boku dziaržavy absalutna ničoha nie robicca, i ŭ pierśpiektyvie my nie bačym, što niejkija zachady buduć zroblenyja», — skazaŭ historyk.
U hetym pytańni, źviarnuŭ jon uvahu, mnohija jeŭrapiejskija krainy praciahvajuć «vyvučać tatalitarnuju spadčynu, raspracoŭvać navučalnyja dapamožniki, prahramy i mierapryjemstvy, u pieršuju čarhu dla maładych pakaleńniaŭ, pra tatalitarnuju historyju, čałaviečuju hodnaść, pravy i asnoŭnych svabody čałavieka, pluralizm, demakratyju i pamiarkoŭnaść». U Jeŭropie, adznačyŭ historyk, zaachvočvajuć i padtrymlivajuć dziejnaść niaŭradavych arhanizacyj, jakija pravodziać daśledčuju i aśvietnickuju pracu ab złačynstvach tatalitarnych režymaŭ. «U Biełarusi za heta navat nie ŭzialisia», — dadaŭ Kuźniacoŭ.