Na CEC u Łunincy adbyŭsia mahutny vybuch, zahinuŭ čałaviek
Śledčy kamitet (SK) Biełarusi pravodzić nieabchodnyja śledčyja mierapryjemstvy na miescy CEC, što častkova abrynułasia ŭ Łunincy (Bresckaja vobłaść). Pra heta paviedamiŭ načalnik adździeła infarmacyi i suviaziaŭ z hramadskaściu SK Siarhiej Kabakovič.
«U dadzieny momant na miescy zdareńnia pracujuć śledčyja Ŭpraŭleńnia Śledčaha kamiteta pa Bresckaj vobłaści, — skazaŭ jon. — Z centralnaha aparata SK na miesca zdareńnia vybyła śledča-apieratyŭnaja hrupa, pierasoŭnaja kryminalistyčnaja łabaratoryja. U składzie śledča-apieratyŭnaj hrupy prysutničajuć śpiecyjalisty Dziaržaŭnaha kamiteta sudovych ekśpiertyz».
Pa słovach Kabakoviča, pakul rana kazać «navat ab papiarednich viersijach taho, što zdaryłasia, što kankretna tam adbyłosia».
Jak raniej paviedamiŭ pres-sakratar Ministerstva pa nadzvyčajnych situacyjach Vital Navicki,
u 17.06 u MNS pastupiła paviedamleńnie ab častkovym abrušeńni kanstrukcyj budynka na terytoryi budaŭnictva CEC pa vulicy Čyrvonaj u Łunincy. Zahinuŭ adzin čałaviek, adzin špitalizavany z traŭmami roznaj stupieni ciažkaści. Budynak u ekspłuatacyju ŭviedzieny nie byŭ.
Miž tym, jak paviedamlaje sajt media-polesye.by, vybuch byŭ takoj siły, što jaho pačuli ŭ roznych častkach horada. Mierkavana vybuch adbyŭsia ŭ elektrafiltry. Adnak dakładnaj infarmacyi na hety kont niama, pryčyna vyśviatlajecca. Adzin rabotnik, jaki znachodziŭsia pobač z elektrafiltram, zahinuŭ na miescy. Dvoje paciarpiełych dastaŭleny ŭ Łuniniecki rajonny špital.
Šyby vylatali nie tolki na CEC, ale i ŭ bližejšych budynkach. Na miescy avaryi pracujuć hrupy RANS, RAUS, rajadździeła Śledčaha kamiteta i inšych słužbaŭ.
Aficyjnaje adkryćcio CEC na miascovych vidach paliva płanavałasia na vierasień, pravodzilisia vyprabavalnyja pracy.
Budaŭnictva ciepłaelektracentrali było pačata ŭ sakaviku 2012 hoda. Pa śviedčańni śpiecyjalistaŭ, 70% abstalavańnia budučaj CEC — biełaruskaj vytvorčaści, sama turbina — niamieckaj, adznačaje sajt media-polesye.by.