Kijeŭ abvinavaciŭ Maskvu ŭ vajennym uvarvańni va Ukrainu
ria.ru
Ukraina abvinavaciła Rasiju ŭ vajennym uvarvańni na terytoryju krainy. Pastupajuć paviedamleńni, što prarasijskija siły ŭziali pad kantrol port Novaazoŭsk, adnak pradstaŭniki ŭkrainskaj armii nastojvajuć, što pa-raniejšamu kantralujuć horad.
Mer Novaazoŭska paćvierdziŭ źjaŭleńnie ŭ horadzie apałčencaŭ, a prychilniki samaabvieščanych Danieckaj narodnaj respubliki i Łuhanskaj narodnaj respubliki dzialilisia ŭ sacsietkach fotazdymkami, na jakich bačnyja nastupajučyja tanki.
«Treba adznačyć, što adbyłosia poŭnamaštabnaje vajennaje ŭvarvańnie ŭzbrojenych siłaŭ Rasii na terytoryju Ukrainy. Jano adbyvajecca pa niekalkich napramkach. I siońnia svaimi dziejańniami Hienštab Rasii sprabuje racpylić siły bajcoŭ ATA, kab uziać pad kantrol nasielenyja punkty ŭ Danbasie», — zajaviŭ daradca ministra ŭnutranych spraŭ Ukrainy Zoran Škirak.
Hazieta New York Times paviedamlaje, što tanki, artyleryja i piachota pierajšli miažu Ukrainy z boku Rasii, «atakavaŭšy ŭkrainskija siły i spravakavaŭšy paniku i poŭnamaštabnaje adstupleńnie».
Takim čynam, na dumku vydańnia, «byŭ adkryty novy, treci front u vajnie na ŭschodzie Ukrainy pamiž uradavymi siłami i prarasijskimi sieparatystami».
Raniej ministr zamiežnych spraŭ Šviecyi Karł Bilt napisaŭ u svaim Tvitary: «Zaraz my vidavočna nazirajem vajennaje supraćstajańnie pamiž rehularnymi vojskami Rasii i Ukrainy. Hetamu jość kankretnaja nazva».
U svaju čarhu kancler Hiermanii Anhieła Mierkiel u telefonnaj razmovie z prezidentam Rasii Uładzimiram Pucinym zajaviła, što nieabchodna rastłumačyć paviedamleńni ab źjaŭleńni rasijskich vojskaŭ na terytoryi Ukrainy.
Anhieła Mierkiel taksama praviała telefonnyja pieramovy z prezidentam Ukrainy Piatrom Parašenkam. Jak paviedamiŭ sajt ŭkrainskaha prezidenta, Parašenka i Mierkiel damovilisia prykłaści ŭsie namahańni dla deeskałacyi kryzisu na ŭschodzie Ukrainy.
Tym časam ukrainskaja armija sprabuje akružyć Danieck, jaki staŭ płacdarmam sieparatystaŭ. Bai praciahvajucca i ŭ rajonie Łuhanska.