U Biełarusi mohuć uzmacnić adkaznaść za piedafiliju
U parłamiencie rychtujecca da razhladu ŭ druhim čytańni padtrymanaja deputatami prapanova Ministerstva ŭnutranych spraŭ Biełarusi ab uzmacnieńni adkaznaści za piedafiliju — z 5 da 10 hadoŭ pazbaŭleńnia voli.
Heta budzie mahčyma paśla ŭviadzieńnia ŭ Kryminalny kodeks častki 2 artykuła 168 (pałavyja znosiny z asobaj, jakaja nie dasiahnuła 16-hadovaha ŭzrostu), paviedamiŭ u intervju, apublikavanym na sajcie MUS, namieśnik načalnika ŭpraŭleńnia pa narkakantroli i procidziejańni handlu ludźmi ministerstva Siarhiej Kałtun.
Pavodle jaho słoŭ, u Biełarusi dynamična raźvivajecca nacyjanalnaje zakanadaŭstva. Z ulikam novych vyklikaŭ i pahroz dziejańni pravaachoŭnych orhanaŭ byli b nie takimi efiektyŭnymi, kali b nie svoječasovyja zakanadaŭčyja inicyjatyvy.
«MUS nie mahło nie adreahavać na situacyju ź dziciačaj parnahrafijaj u krainie, nie zrabić rašučyja zachady pa papiaredžańni i niedapuščeńni złačynstvaŭ. Užo sa śniežnia 2008 hoda ŭ Biełarusi dziejničaje artykuł 343 KK (vyrab i raspaŭsiudžvańnie parnahrafičnych materyjałaŭ abo pradmietaŭ parnahrafičnaha charaktaru z vyjavaj niepaŭnaletniaha), jaki praduhledžvaje maksimalnaje pakarańnie ŭ vyhladzie 13 hadoŭ pazbaŭleńnia voli z kanfiskacyjaj majomaści (asabliva ciažkaje złačynstva). Pavyšanaja adkaznaść była ŭviedziena i za vyrab i raspaŭsiudžvańnie pornapradukcyi ŭ internecie», — adznačyŭ pradstaŭnik MUS.
U zakon «Ab pravach dziciaci» ŭviedziena (i dziejničaje) norma ab zabaronie dla raniej sudzimych za pałavyja złačynstvy, handal ludźmi i parnahrafiju zajmać pasady, źviazanyja z vychavańniem i navučańniem dziaciej. Na razhladzie parłamienta ŭ druhim čytańni znachodzicca prajekt zakona, na padstavie jakoha artykuły 343 i 343-1 KK dapoŭniacca takimi prykmietami, jak «tranślacyja parnahrafičnych materyjałaŭ abo publičnaja demanstracyja scen parnahrafičnaha źmiestu».
Jak adznačyŭ Kałtun, ab nieabchodnaści ŭviadzieńnia kryminalnaj adkaznaści za zachoŭvańnie dziciačaj parnahrafii biez mety zbytu vykazvalisia daŭno i mnohija, bo parnahrafija pravakuje piedafiliju. Uviadzieńnie takoj zabarony źjaviłasia b dziejsnaj mieraj prafiłaktyki ŭ dačynieńni da tych, chto schilny da takich złačynstvaŭ, ličyć jon.
Zachoŭvańnie dziciačaha porna pryznajecca złačynnym u Aŭstryi, Vialikabrytanii, Hiermanii, Kanadzie, Narviehii, Polščy, ZŠA, Turcyi, Šviecyi, inšych krainach. Pavodle źviestak amierykanskaha nacyjanalnaha centra dapamohi pry źniknieńni i ekspłuatacyi dziaciej, 40% aryštavanych uładalnikaŭ dziciačaj parnahrafii rabili sproby pa mienšaj miery spakušeńnia niepaŭnaletnich. Statystyka centra pakazvaje, što 21% vyjavaŭ, znojdzienych u kampjutarach piedafiłaŭ, utrymlivali sceny zhvałtavańnia dziaciej z elemientami sadyzmu, źbivańnia i katavańniaŭ, skazaŭ pradstaŭnik MUS.
Pavodle jaho słoŭ, daśledavańni vučonych paćviardžajuć, što kalekcyjaniery porna z vyjavaj nasilla nad dziećmi nadalej niepaźbiežna ŭčyniajuć takoje ž sieksualnaje nasille. «Heta tak zvanaja śpiralnaja sistema pavodzinaŭ. Nie vypadkova MUS inicyjavała i prapracoŭvaje pytańnie ab metazhodnaści ŭviadzieńnia kryminalnaj adkaznaści za pošuk, spampoŭvańnie ŭ internecie i zachoŭvańnie parnahrafičnych materyjałaŭ z vyjavaj dziaciej biez mety raspaŭsiudžvańnia (kalekcyjanavańnie dziciačaj parnahrafii), a taksama za hruminh dziaciej (psichałahičnuju padrychtoŭku praź internet da sieksualnych adnosinaŭ)», — padkreśliŭ Kałtun.