U Breście praduchilena zamoŭlenaje zabojstva: žonka chacieła atrucić muža padčas piknika
U Breście praduchilena zamoŭlenaje zabojstva.
U sumiesnym paviedamleńni MUS i Śledčaha kamiteta havorycca, što supracoŭniki milicyi zatrymali 48-hadovuju padazronuju viečaram 2 vieraśnia z dokazami złačynstva. Znachodziačysia razam z mužam na siamiejnym pikniku, žančyna sprabavała jaho atrucić, padsypaŭšy atrutu ŭ talerku ź ježaj.
U pole zroku apieratyŭnikaŭ upraŭleńnia pa baraćbie z arhanizavanaj złačynnaściu pa Bresckaj vobłaści žančyna trapiła niekalki miesiacaŭ tamu, kali sprabavała znajści vykanaŭcu zabojstva. Jak stała viadoma paźniej, havorka išła ab pazbaŭleńni žyćcia jaje muža.
«Užo na pieršapačatkovym etapie my nie mahli pakinuć hetuju infarmacyju biez uvahi, — paviedamiŭ načalnik 6-ha ŭpraŭleńnia (pa Bresckaj vobłaści) HUBAZiK MUS Siarhiej Karpuk. — Praviedzienyja apieratyŭnyja mierapryjemstvy sapraŭdy paćvierdzili realnaść namieraŭ brestaŭčanki «zamović» svajho muža. Z taho momantu padrychtoŭka da ŭčynieńnia joju złačynstva ŭžo ažyćciaŭlałasia pad našym kantrolem».
Paźniej «vykanaŭca zamovy» byŭ znojdzieny. Sumiesna vyznačyli i sposab učynieńnia złačynstva — atručeńnie mocnadziejnym srodkam. Jaho najaŭnaść u arhaniźmie praź niekalki hadzin paśla śmierci, pavodle słoŭ «prafiesijnaha kilera», nie budzie vyjaŭlenaje ekśpiertyzaj.
«Vykanaŭšy zadumanaje, padazronaja raźličvała atrymać u spadčynu kvateru ŭ Breście i dom z hiektaram ziamli ŭ vioscy, — skazaŭ Karpuk. — Tracina ad koštu kvatery — apłata pasłuh «kilera». Astatniaje — na raźvićcio ŭłasnaha biźniesu».
Pa hetym fakcie ŭpraŭleńniem Śledčaha kamiteta pa Bresckaj vobłaści raspačataja kryminalnaja sprava na padstavie č. 1 art. 14 i p. 12 č. 2 art. 139 KK (zamach na zabojstva z karyślivych mierkavańnia abo pa najmu). Pravodziacca nieabchodnyja śledčyja dziejańni, skiravanyja na atrymańnie dokazaŭ. Pryznačanyja ekśpiertnyja daśledavańni. Padazronaja zaraz zatrymanaja ŭ paradku art. 108 KPK.