800 zajavak na akcyi pratestu
Aktyvisty apazycyi padali bolš za 800 zajavak na praviadzieńnie pikietaŭ 16 śniežnia. Hetyja akcyi pratestu skiravany suprać skasavańnia lhotaŭ. Źjavilisia ŭžo pieršyja admovy na praviadzieńnie pikietaŭ. Časam z zabaŭnymi farmuloŭkami.
Aktyvisty apazycyi padali bolš za 800 zajavak na praviadzieńnie pikietaŭ 16 śniežnia. Hetyja akcyi pratestu skiravany suprać skasavańnia lhotaŭ. Źjavilisia ŭžo pieršyja admovy na praviadzieńnie pikietaŭ. Taksama aktyvisty apazycyi praciahvajuć abskardžvać u sudzie padobnyja admovy.
Pavodle kaardynatara «Sacyjalnaha maršu» Valery Ŭchnalova, siabry Partyi kamunistaŭ Biełaruskaj nakiravali miascovym uładam kala 500 zajavak, astatnija padavalisia inšymi subjektami abjadnanych demsiłaŭ. Ahułam pa Biełarusi planujecca pravieści bolš za 800 akcyj pratestu — pikietaŭ i mitynhaŭ.
«Ja dumaju, nam daduć stanoŭčyja adkazy. Nia ŭsiudy, ale daduć. Kali my budziem mieć hieahrafiju hetaha, my raźmiarkujemsia dzie, što i jak my budziem pravodzić — dzie mitynhi, dzie pikiety. I ŭ lubym razie, niahledziačy na toje, jakija buduć adkazy, ci stanoŭčyja, ci heta budzie zabaroniena, ale ŭ bolšaści svajoj, na pikiety ludzi vyjduć. 17 śniežnia ŭstupaje ŭ dziejańnie zakon ab admienie sacyjalnych harantyjaŭ i lhot. I voś usie našy zajaŭki padadzieny na 16‑ie. I bolšaść ludziej, heta pakazvaje i sacyjalohija, i našy sustrečy ź ludźmi, nie razumiejuć i nie prymajuć toje, što siońnia robić ułada», — skazaŭ Valery Ŭchnaloŭ.
Da prykładu, aktyvisty Bieraściejskaj abłasnoj kaalicyi abjadnanych demsiłaŭ padali kala 117 zajavak na praviadzieńnie pikietaŭ. Ź ich 65 zajavak — u Bieraści, 37 — u Bieraściejskim rajonie, 11 — u Baranavičach. Niekatoryja zajaŭniki ŭžo atrymali pieršyja adkazy ad miascovych uładaŭ.
Aleh Šapavałaŭ z haradzkoha pasiołku Mačuliščy pracytavaŭ list, jaki dasłany ź Mienskaha rajvykankamu. Maŭlaŭ, rajvykankam «na padstavie zakonu ab miascovym kiravańni i samakiravańni, jak harant palityki, jakaja pravodzicca ŭ dziaržavie, nie dazvalaje praviadzieńnie pikietu. Metaj jakoha źjaŭlajecca vykazvańnie pratestu suprać sacyjalnaj palityki ŭładaŭ».
«Admaŭlali pad roznymi pryčynami, ale takaja pryčyna ŭpieršyniu. Ja ŭčora nakiravaŭ list u vykankam. Ja dasłaŭ im kserakopiju ich adkazu, dzie čyrvonym pierakreśliŭ koski, jakija nia treba było stavić, napisaŭ čyrvonym koski, dzie treba było stavić. I napisaŭ: «Biez kamentaroŭ. Tam byli try artahrafičnyja pamyłki i adna stylistyčnaja», — zajaviŭ Aleh Šapavałaŭ.
Aktyvisty Svabodnaha prafsajuzu Biełaruskaha Jury Novikaŭ i Siarhiej Famin padali skarhu ŭ Leninski sud Mahilova. Jany źviartajuć uvahu na niezakonnyja dziejańni kiraŭnika spravami harvykankamu, jaki jašče ŭ žniŭni admoviŭ u praviadzieńni adnaho ź pikietaŭ salidarnaści z Alaksandram Kazulinym. Pavodle kiraŭnika spravami, taki pikiet «źjaŭlajecca sposabam cisku na orhany sudovaj ułady».
Aktyvisty prosiać sud zadavolić zajaŭku na akcyju i abaviazać uładu vyznačyć čas pikietu.
«Davać admoŭnyja adkazy na praviadzieńnie masavych mierapryjemstvaŭ stała normaj dla Mahiloŭskaha harvykankamu. Tak, apošnim časam, u varunkach kampanii «Sacyjalny marš» u harvykankam było padadziena niekalki dziesiatkaŭ zajavak na praviadzieńnie pikietaŭ suprać admieny lhot. I ni adnu ź ich nie zadavolili. Na žal, nivodzin zajaŭnik nie pajšoŭ dalej i nie abskardziŭ rašeńnie harvykankamu. Kali ŭ rajonnym sudzie my nie atrymajem stanoŭčaha rašeńnia, to budziem skardzicca i dalej, ažno da Kamisii AAN pa pravach čałavieka», — zajaviŭ Ju.Novikaŭ.