Biełarusku źniali ź ciahnika z Kryma i zabaranili ŭjezd va Ukrainu na 3 hady
Jana raskazała svaju niepryjemnuju historyju na Tut.by.
20 žniŭnia miedrabotnik Alena ź Minska viartałasia z Kryma dadomu na biełaruskim ciahniku. Na miažy z Ukrainaj jaje ssadzili pamiežniki, u pašpart pastavili štamp ab zabaronie na ŭjezd u hetuju krainu terminam na 3 hady.
Jana kaža, što ŭ takoj absurdnaj situacyi moža akazacca kožny.
«U biełaruskim pamiežnym kamitecie zapeŭnivali, što ŭ nas nie budzie prablem, kali my ŭjedziem u Krym praz Rasiju, a vyjedziem — praz Ukrainu»
Alena pajechała ŭ adpačynak u Krym na aŭtamabili z mužam i dziećmi praz terytoryju Rasii, adpaviedna nijakich štampaŭ u pašparcie im nie stavili. Pavodle jaje słoŭ, jana jašče da pajezdki viedała, što viartacca z paŭvostrava jana budzie adna, bo joj treba raniej vychodzić na pracu. Alena vyrašyła jechać na pramym ciahniku «Simfieropal — Minsk» praz terytoryju Ukrainy.
— I pierš čym kuplać hety kvitok u Minsku, moj muž patelefanavaŭ u biełaruski pamiežny kamitet i spytaŭ, ci mohuć u mianie uźniknuć prablemy, kali ja ŭjedu ŭ Krym praz Rasiju, a vyjedu praz Ukrainu. Jamu skazali, što da mianie jak da hramadzianki Respubliki Biełaruś nijakich pytańniaŭ paŭstać nie moža. Kuplajučy bilet, ja zadała toje ž pytańnie ŭ kasach Biełaruskaj čyhunki, i mnie taksama skazali, što prablem nie ŭźniknie.
Apošni raz Alena zadała takoje ž pytańnie ŭžo na vakzale ŭ Simfieropali pravadniku svajho ciahnika pierad adpraŭleńniem u Minsk. Pa słovach Aleny, žančyna-pravadnik skazała: «Što vy panaprydumlali!»
— A ŭžo na miažy ŭ Džankoi rasijski pamiežnik mnie skazaŭ, što my možam ź im siońnia sustrecca jašče raz. Na majo pytańnie «čamu» jon adkazaŭ, što mianie mohuć źniać ź ciahnika na ŭkrainskaj miažy i byŭ vielmi ździŭleny, što mianie pra heta nichto nie papiaredziŭ.
«Akazałasia, što ja «niezakonna trapiła na akupavanuju terytoryju Kryma», tamu atrymała zabaronu na ŭjezd va Ukrainu na 3 hady»
Praz 3 hadziny ciahnik spyniŭsia na ŭkrainskim pamiežnym propusku Novaalaksiejeŭka.
— Zajšli ŭkrainskija pamiežniki, i adzin ź ich, pahladzieŭšy moj pašpart, spytaŭ, jak ja zajechała na terytoryju Kryma. Ja raspaviała, jak usio było. Paśla hetaha jon zaprasiŭ mianie ŭ tambur i skazaŭ, što jany ličać Krym akupavanaj terytoryjaj, na jakuju ja niezakonna pranikła. Na majo pytańnie, jak ja pavinna była ŭjazdžać u Krym, jon adkazaŭ, što heta varta było rabić praz Ukrainu. A kali ja ŭžo i zajechała na paŭvostraŭ z boku Rasii, to, pa jaho słovach, viartacca pavinna była taksama praz Rasiju.
U Novaalaksiejeŭcy Alenie vydali taksama takuju kvitancyju
Alena kaža, što pakul jana razmaŭlała z pamiežnikam, z pravadnicaj i pakidała ciahnik, čuła, jak razmaŭlali ź ludźmi inšyja supracoŭniki pahransłužby.
— Žančynu-rasijanku hadoŭ 60 źniali ź ciahnika prosta ŭ chałacie i ŭ tapkach, i joj pamiežnik — chłopčyk hadoŭ 20 — kaža: «Dla mianie vas ruskich bolš nie isnuje, ja b vam vady nie daŭ. Ja b vas, s*ki, daŭno pazabivaŭ. «I heta kaža pamiežnik na miažy! Jany tam usie maładyja chłopcy, ale stolki nianaviści ŭ vačach ludziej ja jašče nidzie nie bačyła.
Takich, jak jana, akazałasia, pa słovach Aleny, jašče kala 5 čałaviek: rasiejcy i mužčyna ź Biełarusi.
Śviedčańnie viartańnia ŭ Krym praz rasijski punkt propusku ŭ Džankoi
Alena viarnułasia dadomu praz Rasiju tolki praz 10 dzion. Kaža, što ŭ Krymie vialikaja prablema kupić zvarotny bilet. Daroha da Maskvy na aŭtobusie abyšłasia joj u 90 dołaraŭ, a voś viarnuć usio 800 tysiač za płackart Simfieropal — Minsk naŭrad ci ŭdasca.
Pahransłužba Ukrainy: «Hramadzianka Biełarusi była źniataja ź ciahnika na padstavie zakona»
Pa tłumačeńni my źviarnulisia ŭ Azova-Čarnamorskaje rehijanalnaje kiravańnie Dziaržaŭnaj pamiežnaj słužby Ukrainy, u padparadkavańni jakoha znachodzicca punkt propusku Novaalaksiejeŭka. Tam nam raspaviali, što hramadzianka Biełarusi była źniataja ź ciahnika i atrymała zabaronu na ŭjezd va Ukrainu na padstavie zakona.
— Ukrainskija punkty propusku ŭ Krymie z boku Rasii byli začynienyja zhodna z pastanovaj Kabinieta ministraŭ Ukrainy, adpaviedna, zajazdžajučy praź ich u Krym, čałaviek parušaje ŭkrainski zakon. Pamiežnik mieŭ racyju, skazaŭšy, što žančyna niezakonna trapiła na akupavanuju terytoryju.
Ukraina pryznaje Krym svajoj terytoryjaj, ale z-za akupacyi nie moža zabiaśpiečyć pamiežny kantrol pamiž paŭvostravam i Rasijaj. Adpaviedna, zhodna z ukrainskim zakanadaŭstvam, zajazdžajučy ŭ Krym (heta značyć na terytoryju Ukrainy) z boku Rasii i nie atrymlivajučy pra heta adznaki ŭ pašparcie, čałaviek niezakonna traplaje na terytoryju suvierennaj dziaržavy.
Na sajcie ambasady Ukrainy ŭ Biełarusi jość infarmancyja ab tym, što adbyvajecca z zamiežnikam pry sprobie zajechać na terytoryju Ukrainy z Kryma biez adznaki ŭ pašparcie.
Zhodna z hetaj infarmacyjaj, zamiežnamu hramadzianinu zabaraniajecca dalejšy ruch, i jon viartajecca albo nazad «na akupavanuju terytoryju», albo ŭ krainu, jakaja vydała jamu pašpart.
Padobnyja praviły buduć dziejničać da «poŭnaha adnaŭleńnia kanstytucyjnaha ładu Ukrainy na časova akupavanaj terytoryi», adznačajecca ŭ paviedamleńni.