Vice-prezident SB: Ekanamičnaja madel Biełarusi maje patrebu ŭ reformach
Isnujučaja ŭ Biełarusi ekanamičnaja madel maje patrebu ŭ paśladoŭnych i ŭsiebakovych reformach, zajaviła siońnia na bryfinhu ŭ Minsku vice-prezident rehijona Jeŭropy i Centralnaj Azii Suśvietnaha banka (VB) Łora Tak.
Jana znachodziłasia ź vizitam u Biełarusi 15—17 vieraśnia dla abmierkavańnia chodu realizacyi stratehii partniorstva Hrupy Suśvietnaha banka dla Respubliki Biełaruś i abmienu mierkavańniami pa klučavych kirunkach doŭhaterminovych strukturnych pieraŭtvareńniaŭ. Padčas vizitu Łora Tak sustrełasia z kiraŭnikom dziaržavy Alaksandram Łukašenkam, premjer-ministram Michaiłam Miaśnikovičam i inšymi pradstaŭnikami ŭrada.
Pavodle jaje słoŭ, kiraŭniki Biełarusi vykazali zacikaŭlenaść u pašyreńni supracoŭnictva z Suśvietnym bankam i atrymańni techničnaj dapamohi ŭ raspracoŭcy doŭhaterminovaj stratehii strukturnych pieraŭtvareńniaŭ.
«Respublika Biełaruś dasiahnuła značnych vynikaŭ u svaim raźvićci, niekatoryja ź jakich ja ŭbačyła padčas vizitu. Niesumnienna, Biełaruś vałodaje patencyjałam dla taho, kab stać kvitniejučaj i kankurentnaj ekanomikaj. Adnak dla realizacyi hetaha patencyjału isnujučaja ekanamičnaja madel maje patrebu ŭ paśladoŭnych i ŭsiebakovych reformach», — padkreśliła vice-prezident SB.
«My bačym rolu Suśvietnaha banka ŭ akazańni analityčnaj i kansultatyŭnaj padtrymki orhanam dziaržaŭnaha kiravańnia, a taksama ŭ davańni infarmacyi, zasnavanaj na mižnarodnym vopycie, jakaja moža spatrebicca pry raspracoŭcy i realizacyi mier, skiravanych na strukturnyja pieraŭtvareńni, u tym liku pry refarmavańni siektara dziaržaŭnych pradpryjemstvaŭ, stvareńni bolš dynamičnaha pryvatnaha siektara i ŭmacavańni instytutaŭ dla padtrymki inavacyj i kankurencyi», — skazała Łora Tak.
Jana taksama paviedamiła, što sustrełasia z pradstaŭnikami dziełavych kołaŭ i hramadzianskaj supolnaści Biełarusi, naviedała šerah pradpryjemstvaŭ, jakija adlustroŭvajuć inžynierna-vytvorčy patencyjał krainy, i respublikanski lasny sielekcyjna-nasieńniavodčy centr, zasnavany ŭ miežach prajekta, jaki finansavaŭsia SB u kancy 90-ch hadoŭ. Aprača taho, Łora Tak aznajomiłasia z vynikami madernizacyi aŭtamabilnaj darohi Minsk — Homiel u miežach prajekta, padtrymanaha SB.
Ciapierašni vizit staŭ pieršym aficyjnym vizitam u Biełaruś Łory Tak paśla ŭstupleńnia jaje na pasadu vice-prezidenta rehijona Jeŭropy i Centralnaj Azii SB u vieraśni 2013 hoda.
Z času dałučeńnia Biełarusi da Suśvietnaha banka ŭ 1992 hodzie ahulnaja suma pazykovych srodkaŭ skłała 1,14 młrd. dołaraŭ. Aprača taho, ahulny abjom hrantavaha finansavańnia skłaŭ 25 młn. dołaraŭ. Ciapier inviestycyjny partfiel Suśvietnaha banka ŭ Biełarusi ŭklučaje piać prajektaŭ na ahulnuju sumu 648 młn. dołaraŭ.