U Biełarusi adkryjucca polskija vizavyja centry
Heta dazvolić padavać zajaŭki na vizu i pašpart, nie naviedvajučy asabista konsulstva ci ambasadu.
Jak paviedamlaje Gazeta Wyborcza, vice-ministr zamiežnych spraŭ RP Tomaš Arłoŭski i ministr zamiežnych spraŭ Biełarusi Uładzimir Makiej padčas sustrečy 25 kastryčnika damovilisia adkryć u našaj krainie polskija vizavyja centry.
— My atrymali ad biełaruskich uładaŭ piśmovuju zhodu na adkryćcio vizavych centraŭ, — paviedamiŭ Arłoŭski. — Zaraz usio budzie zaležać ad polskich uładaŭ, dzie, kali i jak my ich stvorym.
Na dumku Arłoŭskaha, takija centry paśpiachova pracujuć va Ukrainie i ŭ Rasii.
– My viedajem, što heta značna ablehčyć nam vydaču vizaŭ, – dadaŭ jon. – Padobnuju praktyku ŭ Biełarusi ŭžo realizavała Vialikabrytanija.
Polski čynoŭnik padkreśliŭ, što polskija konsulstvy ŭ našaj krainie vydajuć bolš za pałovu ŭsich šenhienskich vizaŭ, što afarmlajucca ŭsimi krainami ES dla biełarusaŭ.
Pakul razmova idzie pra 2-3 vizavyja centry. Nakolki pavysiacca vydatki dla biełarusaŭ pry atrymańni vizaŭ praz takija centry, pakul nieviadoma.
***
Vizavy centr – heta aŭtsorsinhavaje kamiercyjnaje pradpryjemstva, jakoje dazvalaje padać zajaŭku na vizu i atrymać pašpart bieź nieabchodnaści samomu naviedvać konsulstva.