Sud adchiliŭ pazoŭ panamskaha dyktatara da raspracoŭščykaŭ «stralałki»
Były «najvyšejšy lider nacyjanalnaha vyzvaleńnia Panamy» Manuel Narjeha prajhraŭ sud z vydaŭcom hulni Call of Duty: Black Ops II, dzie jon źjaŭlajecca adnym z hałoŭnych antahanistaŭ, paviedamlaje The Verge sa spasyłkaj na Associated Press.
Manuela Narjehu nie zadavolnała «ŭzbahačeńnie na jaho imieni», «viadzieńnie niesumlennaha biznesu» i «ŭpuščany prybytak»: jaho imia i źniešnaść skarystali raspracoŭščyki videahulni 2012 hoda Call of Duty: Black Ops II, u jakoj hieroi pieraśledujuć Narjehu, vinavataha ŭ šmatlikich vydumanych złačynstvach.
Pozvu suprać vydaŭca hulni Activision 80-hadovy Narjeha padaŭ u sud Łos-Anželesa ŭ lipieni 2014 hoda.
Sudździa Uiljam Fahiej adchiliŭ pozvu 28 kastryčnika, spasłaŭšysia na pieršuju papraŭku kanstytucyi ZŠA, jakaja harantuje svabodu słova.
Z 1989 hoda, paśla źviaržeńnia ŭ vyniku vajskovaj apieracyi ZŠA ŭ Panamie, Narjeha znachodzicca za kratami za zabojstvy z palityčnych matyvaŭ.
Imia i vobraz Narjeha taksama vykarystoŭvajecca siarod inšych realnych palitykaŭ ŭ sieryi stratehičnych hulniaŭ Tropico. SUprać raspracoŭščykaŭ Tropico jon nie padavaŭ pozvaŭ.
Padobnaja pozva zaraz razhladajecca ŭ Ńju-Jorku: aktrysa Lindsi Łochan padała ŭ sud na raspracoŭščykaŭ hulni Grand Theft Auto 5. Jana zajaŭlaje ab naŭmysnym kapijavańni jaje vobraza ŭ piersanažy hulni i na rekłamnych posterach. Raspracoŭščyki hulni śćviardžajuć, što lehalna vykarystoŭvali dla postera vobraz inšaj madeli, Šełbi Uelinder. Taksama jany zajaŭlajuć, što Łochan «sprabuje nažycca na raskručanym brendzie» i što «zaŭvažyła padabienstva tolki praz hod pa vychadzie hulni».