Pucin: ZŠA žadajuć padparadkavać sabie Rasiju, ale hetaha nie budzie
Nikoli nikomu ŭ historyi nie ŭdavałasia padparadkavać Rasiju, i nikomu nie ŭdasca, zajaviŭ prezident RF.
«Jany nie źniavažyć nas chočuć, jany chočuć nas padparadkavać. Chočuć za naš košt vyrašać svaje prablemy, chočuć padparadkavać nas svajmu ŭpłyvu. Nikoli nikomu heta ŭ historyi ŭ dačynieńni da Rasiei nie ŭdavałasia i nikomu nie ŭdasca», — skazaŭ Pucin, kamientujučy vykazvańnie adnaho z udzielnikaŭ «Forumu dziejańniaŭ» Abjadnanaha narodnaha frontu ab tym, što ZŠA žadajuć źniavažyć Rasiju.
Abjadnany narodny front — parasonavaja arhanizacyja prychilnikaŭ Pucina. Jana była stvorana, kali stała jasna, što partyja «Adzinaja Rasija» ŭ narodzie niepapularnaja.
Pucin taksama źvinavaciŭ ZŠA ŭ padparadkavańni svajmu ŭpłyvu sajuźnikaŭ, «ci, jak u nas łajalisia movaj płakata, «svaich satelitaŭ».
«I voś heta atrymlivajecca, bo, na žal, mnohija ź ich sajuźnikaŭ u škodu ŭłasnym nacyjanalnym intaresam sprabujuć abaranić čužyja nacyjanalnyja intaresy pa niezrazumiełych padstavach i ź niezrazumiełaj pierśpiektyvaj», — skazaŭ Pucin.
Rasija dva z pałovaj stahodździa była ŭ zaležnaści ad manholskaj ardy. U XVII st. Maskvu zachapili biełaruska-polskija vojski, a bajary paklikali na carstva karaleviča Uładzisłava Vazu. Adnak paśla zachopu Urała i Sibiry ź ich pryrodnymi bahaćciami sfarmiravaŭsia nacyjanalistyčny mif pra niepieramožnaść i ŭnikalnaść rasijskaha naroda.