Baćka źbitaha 5-miesiačnaha chłopčyka: Žonka pisała sms, što budzie ździekavacca z syna
U Śledčym kamitecie raskryli padrabiaznaści spravy.
Śledčymi byŭ dapytany baćka dziciaci. Jon raskazaŭ, što z žonkaj pabraŭsia sioleta ŭ lutym, a paznajomilisia ŭ sakaviku 2013.
«Kłopat i dohlad ab ich sumiesnym dziciaci abciažarvali žonku, raniej jana prysyłała jamu sms-paviedamleńnie ab tym, što źbirajecca ździekavacca ź dziciaci. 21 listapada jon pajšoŭ na pracu kala 19 hadzin, viarnuŭsia dadomu ranicaj, 22 listapada, kala 4 hadzin. Kali sychodziŭ, to žonka zastavałasia adna ź dziciem, była ćviarozaj. Uviečary pa telefonie žonka tłumačyła, što raśpivała śpirtnyja napoi. Pa viartańni, jon vyjaviŭ na dziciaci ślady pabojaŭ ŭ vyhladzie drapiny i hiematom. Jakim čynam toj atrymaŭ cialesnyja paškodžańni, žonka jamu nie skazała. Jon patelefanavaŭ na liniju «103» i paviedamiŭ, što dzicia blednaje i chałodnaje, a žonka prasiła nie vyklikać miedycynskich rabotnikaŭ»,
— adznačyli ŭ Śledčym kamitecie.
Maci chłopčyka pryznała svaju vinu. Pry praviercy pakazańniaŭ jana pakazała, jakim čynam źbivała syna.
Siamja na ŭliku ŭ milicyi nie była. 20-hadovaja maci maje bazavuju adukacyju. U 2011 i 2013 jana praciahvałasia da administacyjnaj adkaznaści za raśpićcio ałkaholnych napojaŭ. Nie sudzimaja.
«Pa vynikach miedycynskaha ahladu, u suviazi z zatrymańniem, u jaje vyjaŭlena ciažarnaść rańniaha terminu, supraćpakazańni dla źmiaščeńnia ŭ izalatar časovaha ŭtrymańnia adsutničali»,
— skazali ŭ SK.
Nahadajem, pry ahladzie miedrabotnikami ŭ dziciaci byli vyjaŭleny čerapna-mazhavaja traŭma, udar, aciok i hiematoma hałaŭnoha mozhu z krovaźlićciom, pierałom plača, što adnosiacca da katehoryi ciažkich cialesnych paškodžańniaŭ.
Chłopčyk znachodzicca ŭ balnicy, jon žyvy.
Sa słoŭ padazravanaj, pierad hetym jana piła, pakul baćka byŭ na pracy. Syn staŭ płakać, i jana, kab jaho supakoić,
naniesła nie mienš za 5 udaraŭ dałońniu pa tvary, zatym kidała jaho na kanapu i łožak, paśla čaho lehła spać.
U dačynieńni da maci dziciaci zaviedziena kryminalnaja sprava pa č. 1 art. 14, č. 2 art. 139 (zamach na zabojstva zaviedama małaletniaj asoby, jakaja znachodzicca ŭ biezdapamožnym stanie) Kryminalnaha kodeksa.