Pryčyna — niaščasnaje kachańnie: zavieršana pravierka pa fakcie śmierci 16-hadovaha padletka ŭ budynku supołki «Śviedkaŭ Ijehovy»
Śledčym upraŭleńniem USK pa Homielskaj vobłaści zavieršana pravierka pa fakcie śmierci 16-hadovaha žychara h. Rečycy. Staršakłaśnik byŭ znojdzieny ŭ piatli ŭ budynku relihijnaj abščyny «Śviedki Ijehovy», paviedamlaje pres-słužba SK pa Homielskaj vobłaści.
U chodzie pravierki ŭstanoŭlena, što 25 žniŭnia ŭ druhoj pałovie dnia niepaŭnahadovy pajšoŭ dla naviadzieńnia paradku ŭ dom, jaki naležyć supołcy.
Chłopiec doŭha nie viartaŭsia dadomu, i heta vyklikała zaniepakojenaść u ajčyma. Mužčyna adpraviŭsia pa školnika ŭ budynak abščyny. Uvachodnyja dźviery była zamknutyja znutry. Praź niekatory čas ajčym zajšoŭ u dom z zapasnoha vychadu i ŭ harderobnaj častcy faje vyjaviŭ školnika, jaki visieŭ na sietkavym kabieli biez prykmiet žyćcia.
Śledča-apieratyŭnaja hrupa staranna vyvučyła rečavuju abstanoŭku.
Śladoŭ i pradmietaŭ, jakija pakazvajuć na dačynieńnie inšych asob da śmierci niepaŭnaletniaha, vyjaŭlena nie było.
Pry ahladzie miesca zdareńnia była kanfiskavana pieradśmiarotnaja zapiska z rukapisnym tekstam. Niepaŭnahadovy napisaŭ baćkam, što jon vyrašyŭ skončyć žyćcio samahubstvam z-za ździajśnieńnia nieprystojnych učynkaŭ.
U ramkach daśledčaj pravierki praviedzieny šerah ekśpiertnych daśledavańniaŭ, apytanyja siabry, znajomyja, susiedzi, nastaŭniki i adnakłaśniki pamierłaha, členy relihijnaj abščyny.
Ustanoŭlena, što ŭ niepaŭnaletniaha skłalisia składanyja ŭzajemaadnosiny ź dziaŭčynaj, jakaja taksama naviedvała schody abščyny. Pamiž imi nieadnarazova ŭźnikali kanflikty, u tym liku na hlebie reŭnaści chłopca. Paśla svarak školnik nie raz vykazvaŭ dziaŭčynie namier skončyć žyćcio samahubstvam.
Pavodle zaklučeńnia sudova-miedycynskaj ekśpiertyzy śmierć niepaŭnaletniaha nastupiła ad «miechaničnaj aśfiksii ŭ vyniku zdušeńnia šyi piatloj pry paviešańni za košt vahi ŭłasnaha cieła».
Vyvučyŭšy materyjały pravierki ŭ ich sukupnaści, śledčyja pryjšli da vysnovy, što śmierć niepaŭnaletniaha nie nosić kryminalny charaktar i źjaŭlajecca suicydam. Pryčynaj samahubstva staŭ unutryasobasny padletkavy kanflikt, jaki ŭ tym liku moh paŭstać na hlebie reŭnaści.