Devalvacyjnyja nastroi dajšli da Kazachstana, Nazarbajeŭ zaklikaje da spakoju
Ludzi masava pieravodziać układy z tenhie ŭ dalary i jeŭra.
«Paśla kryzisaŭ idzie ŭzdym ekanomiki, pavialičvajecca spažyvańnie nafty i hazu. Značyć, budzie ŭzdym ceny na naftu i haz, — zajaviŭ u niadzielu kiraŭnik krainy Nursułtan Nazarbajeŭ. — Ja ŭžo abviaściŭ, što sacyjalnyja abaviazacielstvy ni ŭ jakim razie nie buduć skaračacca. Heta značyć piensii, zarabotnyja płaty biudžetnych arhanizacyj, abarony i ŭsio astatniaje. Niachaj nasielnictva Kazachstana nie chvalujecca».
Nazarbajeŭ zavieryŭ, što ŭ Kazachstana jość płan na 70, 60, 50 i navat 40 dalaraŭ za barel. «Jon u mianie lažyć pad suknom, jak toj kazaŭ. Čamu ja śmieła mahu skazać, bo ŭ nas jość reziervy dla hetaha na čorny dzień», — skazaŭ Nazarbajeŭ.
«My nazirajem, što ŭ śviecie adbyvajecca, hladzim, što adbyvajecca ŭ Rasiei. Na siońnia ŭ Kazachstanie ničoha nie adbyvajecca, nie treba chvalavacca, nie treba stvarać ažyjataž. Suprać tych, chto stvaraje ažyjataž, harłapanić i pałochaje ludziej, u nas pryniaty zakon, my ich budziem sudzić», — cytujuć Nazarbajeva infarmacyjnyja ahienctvy.
U Kazachstanie na fonie źnižeńnia cenaŭ na naftu i kursu rasijskaha rubla taksama ŭzmacnilisia devalvacyjnyja čakańni. Z pačatku hoda nasielnictva kanviertavała z tenhie ŭ dalary značny abjom svaich układaŭ.