24-hadovy mužčyna z krykami «Ja robat!» i truboj ad pyłasosa źbiŭ žančyn u internacie
Žycharka Skidala źviarnułasia ŭ milicyju paśla taho, jak u jaje internat uvarvaŭsia nieznajomy mužčyna. Z krykami «Ja robat!» jon haniaŭ ludziej pa kalidory, a potym uvarvaŭsia ŭ pakoj žančyny i źbiŭ jaje i jaje dačku, raspaviali ŭ pres-słužbie UUS Hrodna.
Žychar vioski Hliniany Hrodzienskaha rajona 1990 hoda naradžeńnia, znachodziačysia ŭ stanie ałkaholnaha apjanieńnia, u minułuju niadzielu ŭ hadzinu nočy naviedaŭ internat u horadzie Skidal. Što jaho tudy pryviało, skazać składana, bo znajomych, jakija pražyvajuć u hetym internacie, u mužčyny niama.
Z krykami «Ja robat!» jon staŭ haniać ludziej pa kalidory, schapiŭ pieršaje što trapiłasia pad ruku — a heta byŭ nož i mietaličnaja truba ad pyłasosa, uvarvaŭsia ŭ adzin z pakojaŭ i tam źbiŭ 39-hadovuju žančynu i jaje 15-hadovuju dačku, paśla čaho ŭciok.
U milicyju źviarnułasia paciarpiełaja. Jana paviedamiła prykmiety złamyśnika, i supracoŭniki adździaleńnia kryminalnaha vyšuku Hrodzienskaha RAUS pačali pošuki. U chodzie apieratyŭna-vyšukovych mierapryjemstvaŭ chulihan byŭ zatrymany.
Ciapier jon znachodzicca ŭ izalatary časovaha ŭtrymańnia, adkul adpravicca na łavu padsudnych. U dačynieńni da jaho raspačata kryminalnaja sprava pa častcy 3 artykuła 339 «Chulihanstva».