Pierad pryjezdam Łukašenki z Kolem Śviata-Duchaŭ sabor byŭ ačepleny
Ranicaj 7 studzienia supracoŭniki milicyi nie prapuskali viernikaŭ da kafiedralnaha Śviata-Duchavaha sabora ŭ Minsku, paviedamiła aktyvistka arhkamiteta pa stvareńni partyi «Biełaruskaja chryścijanskaja demakratyja» Valeryja Čarnamorcava, jakaja taksama pryjšła ŭ hetuju ranicu ŭ chram.
Milicyjaniery rastłumačyli, što šukajuć bombu, paviedamlaje pres-słužba arhkamiteta BCHD. Paśla zaviaršeńnia ahladu terytoryi chrama jany dazvolili prajści da carkvy spačatku śviataru, a zatym i inšym viernikam.
Adnak Valeryju Čarnamorcavu tak i nie puścili ŭ sabor, pakolki na joj byŭ paviazany bieł-čyrvona-bieły šalik. Milicyjaniery pryhrazili, što zatrymajuć aktyvistku. Čarnamorcava źniała šalik i schavała jaho ŭ sumku, adnak usio adno nie zmahła trapić u chram.
Aficyjnaha paćviardžeńnia incydentu z pošukam bomby kala hałoŭnaha sabora stalicy ranicaj 7 studzienia ŭ HUUS nie było atrymana. Zatoje na sajcie BiełTA źjaviłasia infarmacyja, što siońnia Minski Śviata-Duchaŭ kafiedralny sabor naviedaŭ Alaksandr Łukašenka z synam Mikałajem…