Biełaruskija «kibarhi» zmahajucca pad Danieckim aeraportam FOTY, VIDEA
dadałosia videa
Biełaruskija dobraachvotniki ŭstalavali bieł-čyrvona-bieły ściah u vioscy Piaski, klučavoj pazicyi, jakaja dapamahaje ŭkrainskim žaŭnieram utrymlivać Daniecki aeraport, paviedamiła supołka «Zhurtavańnie patryjotaŭ» u Facebook u subotu.
«Na pazicyjach, razam z ukrainskimi praparami, załunaŭ bieł-čyrvona-bieły ściah», — havorycca ŭ podpisie da fota.
Pazaŭčora, 15 studzienia, supołka pisała: «Idzie kantaktny boj u novym terminale DAPa, dystancyi 50-100 m. Siepary lezuć šturmavymi hrupami z usich kirunkaŭ. Varta ZSU pracuje bieź pierapynku. Našy chłopcy trymajuć pazicyi sprava ad aeradroma».
Fota biełaruskich dobraachvotnikaŭ, vystaŭlenaje 15 studzienia.
Vioska Piaski — krytyčna važny punkt pobač z aeraportam, utrymlivajučy jaki, ukrainskaja armija moža efiektyŭna dapamahać abaroncam aeraporta artyleryjaj i bojeprypasami.
Pazicyi ŭ Piaskach časta sprabujuć atakavać bajeviki, jakija i tak uvieś čas abstrelvajuć viosku minamiotnym i artyleryjskim ahniom.
Frantavaja tvorčaść. Fota 16 studzienia
Rasijskija ŚMI ŭžo šmat razoŭ paviedamlali pra zachop Danieckaha aeraporta, jaki staŭ simvałam ukrainskaha supracivu z vosieni 2014 hoda, kali na dapamohu amal raźbitym rasijskim bajevikam masava pryjšli rehularnyja častki armii RF.
U vyniku abaroncy aeraporta, atrymaŭšy za svaju niazłomnaść mianušku «kibarhi», pachavali mif pra toje, što na postsavieckaj prastory nichto nie moža doŭha supraćstajać vajennaj mašynie Rasii.