U horadzie, dzie zdymali «Levijafan», biznesmen zastreliŭ mera, jaho namieśnika i skončyŭ žyćcio samahubstvam
Taja historyja zdaryłasia ŭ 2009 hodzie, ale cikavaść da jaje źjaviłasia ciapier, kali ministr kultury Rasii abvinavaciŭ režysiora Źviahincava ŭ paklopie na rasijskuju rečaisnaść.
U paŭnočnarasijskim horadzie Kiraŭsk, dzie zdymaŭsia naminavany na Oskar «Levijafan» Andreja Źviahincava, 6 hadoŭ tamu adbyłosia žorstkaje dvajnoje zabojstva. Jak nahadvajuć rasijskija ŚMI, byŭ zastreleny kiraŭnik administracyi horada Illa Kielmanzon, a taksama jaho namieśnik pa ŽKH, cieniavy «haspadar horada» Siarhiej Maksimaŭ. Zabojca — pažyły pradprymalnik Ivan Ankušaŭ, daviedzieny da adčaju haradskimi čynoŭnikami.
Illa Kielmanzon raniej pracavaŭ u finupraŭleńni horadaŭtvaralnaha pradpryjemstva «Apatyt», pierajšoŭ u meryju ŭ 2007 hodzie.
62-hadovy zabojca vałodaŭ u Kiraŭsku čatyrma kramami.
Usio adbyłosia kala 10.30. Z ranicy Kielmanzon sustrakaŭsia z supracoŭnikami ustanoŭ kultury, pravioŭ aparatnuju naradu i bryfinh dla žurnalistaŭ. Zastaŭšysia ŭdvuch, čynoŭniki zaprasili da sabie biznesoŭca Ankušava, jaki čakaŭ u pryjomnaj. Płanavałasia abmierkavać majučaje adbycca skasavańnie damovy arendy pamiaškańniaŭ, dzie raźmiaščałasia krama Ankušava.
Zajšoŭšy ŭ kabiniet, pradprymalnik rasstralaŭ spačatku namieśnika, a paśla i mera.
Śledam jon skončyŭ žyćcio samahubstvam.
Pišuć, što namieśnik mera karystaŭsia aŭtarytetam u kryminalnych kołach. U svaju čarhu, pradprymalnik, pa słovach jahonaha syna, byŭ daviedzieny da adčaju paborami.