Źbiary sam: jak Google stvaraje telefon-kanstruktar Project Ara
Modulny smartfon Project Ara abiacaje stać adnoj z najcikaviejšych techničnych navinak hoda. Navošta pa zapčastkach źbirać telefon karystalniku i Google?
Raźbiŭ ekran – zamiani modul ekrana, tarmazić hulnia – zamiani modul pracesara, chočaš kruciejšyja fota – zamiani modul kamiery. Treba mahutnaja batareja – zamiani niepatrebny modul druhoj batarejaj. I nie zaśmiečvaj asiarodździe vysokatechnałahičnymi adkidami. Takaja ideja Prajektu Ara – smartfona ad Google, jaki možna sabrać pa častkach.
Prajekt raspačaŭsia ŭ 2012 hodzie ŭ ścienach šmatpakutnaj Motorola. Pieršy pratatyp vyhladaŭ hruvastkim i pracavaŭ nadta pavolna. Zatoje demanstravaŭ: pracesar možna źmianić tak ža lohka, jak sim-kartu.
Niadaŭna Google, što praciahnuła prajekt Motorola, pakazała druhi pratatyp, Spiral 2, jaki ŭžo bolej nahadvaje zvyčajny smartfon, chaj taŭstavaty i ciažkavaty. Žurnalistam dahetul nie dazvalajuć razbłakiravać smartfon – z prahramnym zabieśpiačeńniem ciažkaści navat u samich raspracoŭščykaŭ.
Na mietaličny korpus z 14 kanektarami možna pastavić 10 źmiennych błokaŭ, siarod jakich dyspłej, pracesar, batareja, kamiera, dynamik, anteny, moduli WiFi dy Bluetooth, sensary i kanektar dla zaradki.
Trymajucca jany na elektramahnitach: u kišeni nie razvalicca, a pry patrebie lohka raźbirajecca pry adklučanym mahnicie. Na žal, nieviadoma, ci možna budzie pavialičyć abjom pamiaci, nie mianiajučy pracesar.
Pieršapačatkova płanavałasia vypuścić korpusy troch pamieraŭ: pad ekranami dyjahanalaŭ 4, 4,7 i 6 calaŭ. Pakul nie paviedamlajecca, ci ŭsie jany dajduć da rynku i ci nie źjavicca novyja.
Raspracoŭščyki raspaviadajuć pra Project Ara:
Ciažka pradkazać, jakija vytvorcy elektroniki zacikaviacca stvareńniem zapčastak dla Project Ara. Ništo nie zaminaje LG pradavać kankurentam svaje dyspłei, Sony – svaje kamiery, a Samsung vyrablać pracesary dla Apple. Ale z adnaho boku, kali taki smartfon stanie papularnym, kampanii «zdaduć» ułasny rynak. Ź inšaha boku, partyi detalaŭ (asabliva na starcie) buduć nie takimi vialikimi, a vytvorčaść kampanientaŭ – składanaj (treba spałučyć jakaść z nadzvyčajnaj kampaktnaściu).
Varyjanty dla paranoikaŭ: zamiest aryhinalnych zapčastak možna budzie padsunuć niajakasnyja padrobki z kitajskich padvałaŭ, a toje i detali-špijony ad śpiecsłužb.
Tym nie mieniej, u niečym padobny pradukt užo jość na rynku. Jašče da prodažu kitajcam Lenovo kampanija Motorola pad kryłom Google pradstaviła Moto X – smartfon, pad jaki možna było abirać bieźlič afarbovak i materyjałaŭ piaredniaj i zadniaj paneli, knopak dy abvodak. Praŭda, zapusk byŭ łakalny (tolki adzin apieratar u ZŠA dazvalaŭ šyroki vybar źniešnaści), a smartfon nie zdabyŭ nadzvyčajnaj papularnaści.
Čakać smartfon novaj viersii, Spiral 3, u prodažy možna ŭžo ŭ 2015 hodzie ŭ Puerta-Ryka. Taki łakalny zapusk dazvolić vyjavić zacikaŭlenaść ludziej u smartfonie-kanstruktary dy adšukać niedachopy pieršaj spažyvieckaj madeli. Darečy, smartfon i detali da jaho buduć raspaŭsiudžvać u mini-venach, padobnych da furhončykaŭ z marozivam.
Pad start prodažaŭ Google abiacaje try dziasiatki zapčastak (pakul hatova 11) i adekvatny čas aŭtanomnaj raboty (pakul akumulatar Spiral 2 na tracinu słabiejšy za siaredniestatystyčny). Bazavuju «bałvanku» navat biez mahčymaści telefanavać (tolki WiFi) Google źbirajecca pradavać prykładna za 50 dalaraŭ.
Niekali prapanoŭvałasia ideja davać razdrukoŭvać ułasny korpus na 3D-pryntary. Ale ad jaje ŭ metach biaśpieki karystalnikaŭ admovilisia. Zatoje dazvolili abirać luby malunak na zadniuju panel i navat zrabili prahramu dla samastojnaha padboru malunkaŭ.
Naŭrad ci modulny smartfon vycieśnić zvyčajny «nierazborny»: jon budzie adnaznačna taŭściejšym i ciažejšym, mnohim moža zdacca mieniej stylovym, najaŭnaść cikavych zapčastak pad pytańniem. Zatoje fanaty techniki zmohuć nie nabyvać štohod novy smartfon, a tolki mianiać sastarełyja detali, a nieakuratnyja pakupniki zekanomiać na ramoncie.