Nacbank: Situacyja z najaŭnaściu valuty ŭ abmienikach pastupova lepšaje
Situacyja z najaŭnaściu zamiežnaj valuty ŭ abmiennych punktach pastupova palapšajecca. Heta vynikaje z adkazaŭ Nacbanka na pytańni ŚMI, apublikavanych na sajcie viedamstva.
«Ciapier prapanova valuty bankami na najaŭnym siehmiencie rynku pavialičvajecca. Pa miery adaptacyi bankaŭ da ŭmoŭ novaha miechanizmu kursaŭtvareńnia i zamacavańnia stanoŭčych tendencyj na valutnym i depazitnym rynkach hetyja pytańni buduć źniatyja», — adznačaje Nacbank.
Na pytańnie, ci nie razhladajecca ŭ pierśpiektyvie adychod ad rekamiendacyi pa farmiravańni kursu (plus-minus 2% da aficyjnaha) ci pašyreńnie hetaha kalidora, Nacbank adkazaŭ: «Zadavalnieńnie luboj canoj ažyjatažnaha popytu nasielnictva na zamiežnuju valutu nieapraŭdanaje. Tamu banki ŭ pieryjad vysokich śpiekulatyŭnych čakańniaŭ pradavali valutu ŭ miežach jaje kupli». Rekamiendacyi pa farmiravańni kursu plus-minus 2% zachavajucca, «bo jany adpaviadajuć mižnarodnaj praktycy», śćviardžaje Nacbank.
Treba zaznačyć, što ciapier na najaŭnym rynku pa-raniejšamu adznačajecca deficyt zamiežnaj valuty. Bolšaść abmiennych punktaŭ pradajuć tolki tuju valutu, jakuju prynosić nasielnictva.
U kamientary BiełaPAN były kiraŭnik Nacbanka Stanisłaŭ Bahdankievič vykazaŭ mierkavańnie, što finansavyja ŭłady abmiažoŭvajuć prodaž zamiežnaj valuty z-za vysokich devalvacyjnych čakańniaŭ nasielnictva.