Bijołah i ekołah zaśpieli hipapatamaŭ za kanibalizmam
Miarkujučy pa historyi, što raspaviadaje BBC, hipapatam niezdarma atrymaŭ narodnuju nazvu ŭ honar mifałahičnaha demana abžorstva Biehiemota.
Fota: bushcampcompany.com
Brytanski ekołah Lidžyja Dorvard zaśniaŭ na kamieru ŭ Paŭdniovaj Afrycy hipapatama, jaki pažyraŭ svajho surodziča. Svaje nazirańni za kanibalizmam travajednych hihantaŭ jon apublikavaŭ u časopisie African Journal of Ecology.
Amierykanski bijołah Džozef Dadli ŭžo šmat hod źbiraje śviedčańni kryvažernaści hipapatamaŭ. Pa ŭsim areale zafiksavana tolki šeść vypadkaŭ, zatoje davoli raznastajnych: hipapatamy mohuć charčavacca antyłopami, słanianiatami i, jak u vypadku Dorvarda, hipapatamami.
Śpiecyjalist pa hipapatamach Kit Ełtrynhiem miarkuje, što da takoha žyćcia žyvioł daviali ludzi. Praz adstreł žyvioł dziela miasa i zuboŭ, hoład dy źniknieńnie krynic presnaj vady hipapatamy pierachodziać da drapiežnaha ładu žyćcia.
Dadli ža pierakanany, što takija pavodziny byli ŭłaścivyja hipapatamam spradvieku. Jon spadziajecca, što bum safary-industryi ŭ Afrycy dazvolić dziakujučy vypadkovym videa turystaŭ atrymać bolš infarmacyi i patłumačyć fakty kanibalizmu hipapatamaŭ.
***
Hipapatam — navukovaja nazva žyvioł (łacinizavanaje hrečaskaje słova, što značyć «račny koń»), jakija ŭ narodzie taksama zavucca biehiemotami. Biehiemot — biblejski deman abžorstva, čyim imiem stali nazyvać hipapatamaŭ va Uschodniaj Jeŭropie z XVIII stahodździa. Mahčyma, asacyjacyju z demanam vyklikaŭ apietyt žyvioły, jakaja pavolna pieražoŭvaje čatyry dziasiatki kiło travy na dzień. Adna lehienda kaža, što nazva pryžyłasia ad imia cyrkavoha hipapatama, jaki zapomniŭsia prostamu ludu svaimi niemałymi pamierami.