U Rasii suprać Zialenskaha i Rohaŭcavaj raspačali kryminalnuju spravu za «finansavańnie karnikaŭ»
U Rasii suprać ŭkrainskaj aktrysy teatra i kino, narodnaj artystki SSSR, Hieroja Ukrainy Ady Rohaŭcavaj i ŭkrainskaha šoŭmiena, akciora, mastackaha kiraŭnika studyi «Kvartał-95» Uładzimira Zialenskaha zaviali kryminalnuju spravu.
U niamiłaści apynuŭsia i artyst cyrka «Cirque du Soleil» Viktar Ki (Kikcieŭ).
Padstavaj dla adkryćcia spravy stała toje, što jany, zarablajučy ŭ RF, pieraličvali svaje hanarary na patreby ŭkrainskich vajskoŭcaŭ u zonie ATA.
Deputat Savieta deputataŭ rajona Jakimanka horada Maskvy Dźmitryj Zacharaŭ źviarnuŭsia ŭ Śledčy kamitet RF z prośbaj pravieści pravierku ŭ dačynieńni da Uładzimira Zialenskaha, Ady Rohaŭcavaj, filmy z udziełam jakich iduć u rasijskim prakacie, a taksama Viktara Ki. A ŭ vypadku «paćvierdžańnia datyčnaści dadzienych asob da finansavańnia karnych bataljonaŭ radykalnych nacyjanalistaŭ, jakija vykarystoŭvajuć zabaronienyja mietady viadzieńnia vajny na Paŭdniovym Uschodzie Ukrainy», — pryniać adpaviednyja miery.
Pavodle padlikaŭ Zacharava, Uładzimir Zialenski achviaravaŭ ŭkrainskaj armii 1 młn. hrn., Ada Rohaŭcava — 52 tys. hrn., Viktar Ki — $60 tys.
Śledčy kamitet zadavoliŭ prośbu deputata. Jaho materyjały buduć dałučanyja da raspačataj spravy pa artykule 356 Kryminalnaha kodeksa RF pa fakcie prymianieńnia vajennasłužačymi USU, a taksama pradstaŭnikami Nachvardii Ukrainy i ŭdzielnikami «Pravaha siektara» «zabaronienych srodkaŭ viadzieńnia vajny na terytoryjach ŁNR i DNR».
Vydańnie «Obozrievatiel» źviazałasia z pres-słužbaj «Kvartał 95», adnak tam zajavili, što nie kamientujuć hetuju navinu.
Viadoma, što Zialenski admoviŭsia pryjechać u Rasiju na premjeru filma «8 novych spatkańniaŭ», jaki ź vialikim pośpiecham idzie ŭ prakacie. Taksama šoŭmen razam z kalehami sa studyi «Kvartał 95» niekalki razoŭ jeździŭ vystupać u zonu ATA, kab padtrymać maralny duch ŭkrainskich bajcoŭ.
Padčas Jeŭramajdanu Ada Rohaŭcava padtrymała pratestoŭcaŭ i vystupiła na scenie na Majdanie Niezaležnaści. A ŭletku 2014 jana sabrała 52 tysiačy hrn. na lačeńnie paranienych bajcoŭ ATA.