Minsuviazi maje błakavać srodki ananimnaści ŭ internecie: ananimajziery, proksi, Tor
Błakavacca buduć nie tolki zabaronienyja sajty, ale i ananimajziery i sietki kštałtu Tor, što dazvalajuć atrymać dostup da zabaronienych sajtaŭ.
Fota: wired.com
Zhodna z pastanovaj Apieratyŭna-analityčnaha centra ad 19 lutaha, Dziaržinśpiekcyja pa elektrasuviazi Minsuviazi budzie błakavać dostup da proksi-siervieraŭ i ananimnych sietak nakštałt Tor. Pastanova nabyła siłu z dnia publikacyi.
Pastanova zaćvierdziła paradak abmiežavańnia dostupu da resursaŭ:
- uładalnikam jakich vyniesienyja dva i bolš piśmovych papiaredžańni Mininfarmacyi ciaham hoda,
- što ŭtrymlivajuć infarmacyju pra niezakonny abarot narkotykaŭ, albo inšuju infarmacy, zabaronienuju da raspaŭsiudu,
- uładalniki jakich nie vykanali patrabavańni dziaržorhana ab likvidacyi parušeńniaŭ zakanadaŭstva pra ŚMI.
Farmavać «čorny śpis» budzie Dziaržinśpiekcyja pa elektrasuviazi pavodle vyrašeńniaŭ Mininfarmacyi.
Dostup da śpisu zabaronienych sajtaŭ buduć mieć tolki dziaržorhany i pastaŭščyki internet-pasłuh.
Prapanavać unieści sajt u čorny śpis ciapier mohuć nie tolki dziaržorhany, ale i luby hramadzianin.
Dostup da sajta, što trapiŭ u «čorny śpis», budzie abmiežavany ciaham 24 hadzin. Pravajdary abaviazanyja vyznačyć adkaznych za vykarystańnie srodkaŭ błakavańnia i analizavać «čorny śpis» raz na dzień.
Pry vyjaŭleńni srodkaŭ dostupu da resursaŭ z «čornaha śpisu» Dziaržinśpiekcyja dadaje ŭ «čorny śpis» identyfikatary i hetych srodkaŭ taksama.
Pastanova adpaviadaje kursu, pryniatamu zakanatvorcami: u 2014 hodzie byŭ padpisany antynarkatyčny dekret, što dazvalaŭ błakavać u internecie resursy zabaronienaj tematyki, a taksama zakon pra ŚMI, jaki vyznačyŭ paradak błakavańnia ŚMI i pryraŭniaŭ da ŚMI luby internet-sajt.
Zhodna z novaj pastanovaj, u Biełarusi mohuć być zabłakavanyja nie tolki ananimajziery i Tor, ale i braŭziery kštałtu Opera i «Jandeks.Braŭzier», što dazvalajuć u režymie ściskańnia trafiku trapić na faktyčna luby resurs. Technična, dla Biełarusi mohuć być stvoranyja asobnyja viersii hetych braŭzieraŭ biez «zabaronienych» funkcyj.
Miechanizm błakavańnia Tor nie vyznačany: technična zabłakavać kožny vuzieł «cybulevaha roŭteru» mahčyma, ale ŭsiu sietku na ŭzroŭni pravajdara — składana.