Makiej: My ščyra zacikaŭlenyja ŭ raźvićci maštabnaha handlova-ekanamičnaha supracoŭnictva z KNDR
«My ščyra zacikaŭlenyja ŭ raźvićci maštabnaha handlova-ekanamičnaha supracoŭnictva z KNDR», — zajaviŭ ministr zamiežnych spraŭ Biełarusi Uładzimir Makiej, sustrakajučysia 9 sakavika ŭ Minsku z kiraŭnikom MZS Paŭnočnaj Karei Li Su Jonam.
«Biełaruś vyrablaje šerah tavaraŭ, jakija byli b cikavyja vašaj krainie, — skazaŭ Makiej. — Vaša kraina maje pradukcyju, jakaja mahła b być cikavaj nam».
Kiraŭnik biełaruskaha MZS adznačyŭ, što asnovaj ideałohii KNDR źjaŭlajecca «staŭka na svaje siły i patencyjał». «My ličym, što ŭ takim turbulentnym śviecie možna vyžyć, spadziejučysia tolki na siabie», — skazaŭ ministr.
Pavodle jaho słoŭ, Biełaruś hatova abmiarkoŭvać z KNDR pierśpiektyvu handlova-ekanamičnaha supracoŭnictva i kankretnyja prajekty, jakija mohuć «nadać jamu dynamiku».
«Vaš vizit budzie spryjać tamu, kab supracoŭnictva vyjšła na bolš vysoki ŭzrovień, — skazaŭ Makiej. — Vaš vizit zrobić vialiki ŭniosak u raźvićcio našaha dvuchbakovaha supracoŭnictva».
U svaju čarhu Li Su Jon adznačyŭ, što Biełaruś i KNDR raździalajuć vialikija adlehłaści, ale niahledziačy na heta, dvuchbakovyja adnosiny «majuć hłybokija karani, daŭniuju historyju». Jon nahadaŭ, što KNDR była adnoj ź pieršych krain, jakaja ŭstanaviła ź Biełaruśsiu dypłamatyčnyja adnosiny paśla nabyćcia apošniaj niezaležnaści.
«My vielmi vysoka aceńvajem i radujemsia, što pad kiraŭnictvam pavažanaha prezidenta Łukašenki vaša kraina dabiłasia vielmi vysokaha raźvićcia, adnačasova pravodziačy niezaležnuju palityku», — skazaŭ kiraŭnik MZS KNDR.