Minčancy «źniali suroki» za 150 młn rubloŭ
Milicyja adšukvaje mahčymych paciarpiełych ad dziejańniaŭ cyhanki-machlarki.
Kalvaryja, ilustracyjnaje fota, z fejsbuka Ludmiły Rubleŭskaj
Jak paviedamlaje HUUS Minharvykankama, u Frunzienskaje RUUS źviarnułasia minčanka z zajavaj ab tym, što ŭ dačynieńni da jaje ŭčynienyja machlarskija dziejańni. Uron byŭ acenieny ŭ 150 młn. rubloŭ.
Akazałasia, što na prypynku hramadskaha transpartu da zajaŭnicy padyšła cyhanka, jakaja, raskazaŭšy žančynie pra čaradu ciažkaściaŭ, prablem i niaŭdač, što spaścihli jaje, paraiła terminova źniać suroki. Paśla praciahłaj hutarki i ŭmiełaha psichałahičnaha nacisku cyhanka zdoleła pierakanać svaju surazmoŭnicu ŭ nieabchodnaści dapamohi, dla čaho damoviłasia znoŭ sustrecca praź dźvie hadziny. Dla praviadzieńnia rytualnych dziejańniaŭ treba było prynieści z saboj hrošy dla apłaty pasłuhi, vadu i kaštoŭnaści z domu.
Sustreča adbyłasia va ŭmoŭleny čas. Rytuał pa źniaćci surokaŭ vyrašyli pravieści ŭ biaźludnym miescy — na Kalvaryjskich mohiłkach.
Tam paśla atrymańnia hrošaj i praviadzieńnia peŭnych manipulacyj «suroki paśpiachova byli źniatyja». Paśla hetaha cyhanka rastłumačyła, što abaviazkova treba ačyścić i kaštoŭnaści. Praŭda, juvielirnyja vyraby dla hetaha na čas treba było zabrać z saboj. Litaralna na dzień. Damovilisia sustrecca nazaŭtra.
Na nastupny dzień na sustreču nichto nie pryjšoŭ. Pa pakinutym numary telefona taksama nie adkazvali.
Niahledziačy na toje što supracoŭniki kryminalnaha vyšuku Frunzienskaha RUUS asobu machlarki ŭstanavili davoli chutka, zatrymać cyhanku apieratyŭna nie ŭdałosia. Hramadzianka susiedniaj krainy kinułasia na ŭcioki, jaje abjavili ŭ vyšuk.
Zatrymali machlarku ŭ Babrujsku. 34-hadovuju raniej sudzimuju za kradziažy i machlarstva padazronuju dastavili ŭ Minsk.
Z ulikam abstavinaŭ zdareńnia ŭ supracoŭnikaŭ kryminalnaha vyšuku jość padstavy mierkavać, što apisanaja vyšej historyja moža być nie adzinaj. Cyhanka moža mieć dačynieńnie da šerahu inšych anałahičnych abo padobnych schiem padmanu. Pryčym nie tolki ŭ Minsku, ale i ŭ inšych haradach krainy.
Tych, chto paciarpieŭ ad dziejańniaŭ machlarki (jaje fota raźmiešana na sajcie HUUS), prosiać źviartacca ŭ dziažurnuju častku Frunzienskaha RUUS stalicy.