Modna stać palakam
Sioleta kolkaść achvotnych zapisacca na kursy polskaj movy vyrasła na Haradzienščynie ŭ niekalki razoŭ. Aktyvisty polskich arhanizacyjaŭ źviazvajuć heta z tym, što ŭrad Polščy pryniaŭ h.zv. Kartu palaka i jaje pieravahami.
U minułym 2007 hodzie na kursach polskaj movy pry niepryznanym biełaruskimi ŭładami Sajuzie palakaŭ navučałasia kala 70 čałaviek. Sioleta takich užo 180. Pryčym apošnim časam vyvučać movu prychodziać ludzi daloka nie studenckaha j nia školnaha ŭzrostu.
U «Polskuju Maciež školnuju» — haradzienskuju arhanizacyju, dzie ŭžo na praciahu bolš jak 10 hadoŭ vykładajuć polskuju movu, — ad pačatku hodu źviarnułasia kala 80 darosłych z prośbaj zapisać ich na kursy. Pryčym heta ludzi nia tolki z samoj Horadni, ale j z vobłaści.
Anžalika Borys, kiraŭnica niepryznanaha ŭładami Sajuzu palakaŭ, kaža, što hetaja zacikaŭlenaść značna ŭzrasła, kali Polšča ŭstupiła ŭ Eŭraźviaz i ŭ Šenhienskuju zonu. Da taho ž u minułym hodzie polski Sejm pryniaŭ zakon ab Karcie palaka.
Borys: «Tam adzin z punktaŭ, jaki patrabuje ad tych, chto pretenduje na Kartu palaka, viedańnia polskaj movy. Zhodna z hetym dakumentam, urad Polščy daje pryvilei svaim suajčyńnikam, jakija žyvuć i ŭ Biełarusi, dla pryjezdu ŭ Polšču».
Kiraŭnička adździełu adukacyi pry niepryznanym Sajuzie palakaŭ, Anžalika Arechva, kaža, što asabliva paśla Novaha hodu da ich pačali źviartacca ludzi starejšaha ŭzrostu z tym, kab navučacca polskaj movie. Na jaje dumku, asnoŭny napłyŭ takich ludziej napieradzie.
Arechva: «Dumaju, što ŭ nastupnym navučalnym hodzie kolkaść achvotnych navučacca movie značna ŭzraście, bo pavinna pačać dziejničać Karta palaka. Užo ciapier pieravažna darosłyja źviartajucca z pytańniem — dzie navučycca polskaj movie».
Spadarynia Arechva raspaviadaje, što ciapier u ich paprostu niama mahčymaści adkryvać novyja hrupy. Ź jaje słovaŭ, jany pačnuć heta rabić z novaha navučalnaha hodu.
Aficyjny Sajuz palakaŭ užo niekalki hadoŭ nia ładzić u Horadni kursaŭ polskaj movy. Staršynia SPB Juzaf Łučnik kaža, što takija kursy isnujuć u inšych haradach Biełarusi, a ŭ Horadni, maŭlaŭ, takoj patreby pakul niama. Praŭda, spadar Łučnik źviartaje ŭvahu na inšaje.
Łučnik: «U nas zaraz aktyvizałasia bolš ustupleńnie ŭ arhanizacyju, pakolki adnym z patrabavańniaŭ Karty palaka źjaŭlajecca j prynaležnaść da palanijnaj arhanizacyi».
Pavodle słovaŭ spadara Łučnika, za apošnija paŭhoda šerahi SPB tolki ŭ Horadni papoŭnilisia na sto čałaviek.