Uschodniuju častku Mahilova z-za pažaru nakryła vobłaka čornaha dymu
Pažar u rajonie Słaŭharadskaj šašy ŭ Mahilovie staŭ pryčynaj čornaha dymu, jaki nakryŭ 24 sakavika ŭschodniuju častku horada.
Vobłaka čornaha dymu raspaŭsiudžvałasia ŭ paŭnočnym kirunku. Kłuby dymu raspaściralisia ad Słaŭharadskaj šašy ŭ bok Dniapra, nakryŭšy žyły siektar i terytoryju vahonabudaŭničaha zavoda. Dym byŭ bačny praktyčna ź luboha punktu abłasnoha centra.
Jak paviedamili ŭ Mahiloŭskim abłasnym upraŭleńni MNS, hareli staryja aŭtamabilnyja pakryški, jakija zachoŭvalisia pad adkrytym niebam na terytoryi pradpryjemstva «Mahiloŭdruhresursy». Ahulnaja płošča ŭzharańnia skłała kala 500 kvadratnych mietraŭ.
Da siomaj hadziny viečara supracoŭniki MNS likvidavali pažar. Paciarpiełych niama. Pryčyna pažaru vyśviatlajecca.