Žurnalist z Bresta Aleś Laŭčuk aštrafavany na 3,78 młn rubloŭ
26 sakavika ŭ sudzie Maskoŭskaha rajona h. Bresta adbyŭsia razhlad administracyjnaj spravy ŭ dačynieńni da siabra HA «BAŽ» Alesia Laŭčuka. Vyniki stali viadomyja siońnia. Jak paviedamiŭ A. Laŭčuk u svaim fejsbuku, jon aštrafavany na 21 bazavuju vieličyniu (3,78 młn rubloŭ).
Pra toje, što sud maje adbycca mienavita ŭ hety dzień, žurnalista papiaredzili ŭ milicyi 18 sakavika – tady ŭčastkovy inśpiektar Maskoŭskaha RAUS h. Bresta, kapitan milicyi Raman Trafimuk skłaŭ administracyjny pratakoł na žurnalista za parušeńnie č. 2 art. 22.9 KaAP.
Padstavaj dla zaviadzieńnia administracyjnaj spravy staŭ materyjał na sajcie «Biełsata» za podpisam «AŁ». Učastkovy mieŭ pry sabie razdrukoŭki hetaha dy inšych materyjałaŭ z sajta, a taksama zakona «Ab ŚMI». Sa słovaŭ milicyjanta vynikała, što aŭtarstva Alesia Laŭčuka nibyta paćvierdziła milicyi surazmoŭca žurnalista.
«Kali maje adbycca sudovaje pasiedžańnie, vyrašaje sud, a nie milicyja, – padkreśliŭ u hutarcy sa słužbaj manitorynhu HA «Biełaruskaja asacyjacyja žurnalistaŭ» Aleś Laŭčuk. – Nijakaj pozvy ja nie atrymaŭ i pra čas razhladu spravy nia viedaŭ. Kali ja patelefanavaŭ u sud Maskoŭskaha rajona, to vyśvietliŭ, što spravu razhladali biez majho ŭdziełu. Pry hetym i mnie, i inšym žurnalistam u sudzie admovilisia davać infarmacyju pra pryniataje rašeńnie. Miarkuju, što praz paru dzion ja daviedajusia, što mianie pakarali čarhovym štrafam»