Stała viadoma imia novaha rektara EHU
Pavodle źviestak BiełaPAN, novym rektaram Jeŭrapiejskaha humanitarnaha ŭniviersiteta (EHU, Vilnia) abrany prafiesar Devid Polik, jaki časova vykonvaje abaviazki rektara. Jaho kandydaturu 3 krasavika ŭchvaliŭ ahulny schod zasnavalnikaŭ. Čakajecca, što aficyjnaja infarmacyja budzie abnarodavanaja paśla vychadnych.
Prafiesar Devid Polik pryjechaŭ u Vilniu ŭ sakaviku 2014 hoda i pracavaŭ pieršym prarektaram i hałoŭnym apieracyjnym dyrektaram VNU. U kastryčniku jon staŭ časovym vykanaŭcam abaviazkaŭ rektara EHU. Prodki (babula i dziadula) Polika –– vychadcy ź Biełarusi, ale sam jon nie razmaŭlaje ni pa-biełarusku, ni pa-rusku. Ciapier jon vyvučaje ruskuju movu.
Da pryjezdu ŭ Vilniu prafiesar Polik zajmaŭ pasadu prezidenta ŭ čatyroch amierykanskich vyšejšych navučalnych ustanovach: škole Čykahskaha instytuta mastactvaŭ, kaledžy Lebanon-Veli, Birminhiemskim paŭdniovym kaledžy i Dziaržaŭnym univiersitecie Ńju-Jorka (adździaleńnie ŭ Kortłandzie), dzie byŭ vykanaŭcam abaviazkaŭ prezidenta i vice-prezidentam pa akademičnych pytańniach. Jon taksama pracavaŭ dekanam fakulteta mastactvaŭ i navuk i dacentam fiłasofii ŭ Sietłskim univiersitecie ŭ Vašynhtonie.
U intervju biełaruskaj słužbie radyjo «Svaboda» ŭ pačatku hetaha hoda Polik skazaŭ, što pieršaja zadača, jakaja staić pierad akademičnaj hramadskaściu EHU, — raspracavać novuju ŭniviersiteckuju instrukcyju ab pravach i adkaznaści, novy stratehičny płan, jaki adlustroŭvaŭ by ciapierašnija realii. Polik kanstatavaŭ prablemu finansavych resursaŭ u EHU. Pavodle jaho mierkavańnia, VNU pavinna zachoŭvać i vykonvać jurydyčnyja patrabavańni krainy znachodžańnia — Litvy — u halinie pracoŭnych adnosin. Razam z tym jon padkreśliŭ, što «EHU — biełaruski ŭniviersitet, jaki pracuje ŭ Litvie i ŭ Jeŭropie».
Nahadajem, 30 vieraśnia 2014 hoda pasadu rektara EHU pakinuŭ prezident univiersiteta Anatol Michajłaŭ, jaki zasnavaŭ univiersitet i kiravaŭ im z momantu stvareńnia. Dla abrańnia novaha rektara kirujučaja rada EHU zasnavała časovy orhan — kamitet pa vybarach rektara Jeŭrapiejskaha humanitarnaha ŭniviersiteta. Šort-list pretendentaŭ na pasadu rektara składaŭsia z šaści imion. U jaho ŭvachodzili troje hramadzian Biełarusi — prafiesar EHU Taćciana Ščytcova, lidar ruchu «Za Svabodu» Alaksandr Milinkievič i historyk Aleś Kraŭcevič, a taksama troje hramadzian ZŠA — prafiesar Devid Polik, prarektar pa raźvićci i kamunikacyi EHU Daryjus Udrys i dyrektar ofisa Instytuta mižnarodnaj adukacyi ŭ Maskvie Edvard Rosłaf.