Łukašenka: Minsk zacikaŭleny ŭ prychodzie kitajskich bankaŭ u Biełaruś
Alaksandr Łukašenka vysoka aceńvaje supracoŭnictva z Kitajem i vykazvaje zacikaŭlenaść u prychodzie kitajskich bankaŭ u Biełaruś.
Ab hetym kiraŭnik biełaruskaj dziaržavy zajaviŭ siońnia na sustrečy ź ministram zamiežnych spraŭ Kitajskaj Narodnaj Respubliki Van I, paviedamlaje BiełTA.
Vitajučy hościa, Łukašenka padkreśliŭ: «My čakali vašaha pryjezdu. U nas jość pra što parazmaŭlać napiaredadni dźviuch važnych padziej — vizitu ŭ Minsk siabra Biełarusi Staršyni KNR Si Czińpina i śviatkavańnia 70-hodździa Vialikaj Pieramohi nad niamiecka-fašysckimi zachopnikami».
Zakranajučy temu handlova-ekanamičnaha supracoŭnictva, kiraŭnik dziaržavy acaniŭ jaho jak vielmi intensiŭnaje.
Pra heta śviedčać i ličby: ŭ 2014 hodzie abjom handlu tavarami i pasłuhami Biełarusi i Kitaja pieravysiŭ $ 4 młrd. Razam z tym Alaksandr Łukašenka zaŭvažyŭ, što jość nievialikaja prablema — admoŭnaje salda. «My abmiarkujem hetaje pytańnie i, dumaju, całkam zmožam spravicca z hetaj prablemaj», — skazaŭ jon.
Kiraŭnik dziaržavy taksama adznačyŭ, što Biełaruś asvoiła kala $ 5,5 młrd kitajskich kredytaŭ. Realizujecca kala 20 prahram z dapamohaj kitajskaha kredytavańnia. «My vam za heta ŭdziačnyja», — padkreśliŭ kiraŭnik dziaržavy. «Ad kredytaŭ my pierachodzim da pramoha inviestavańnia», — dadaŭ jon. Pavodle jaho słoŭ, ažyćciaŭleńnie prajekta Kitajska-biełaruskaha industryjalnaha parku budzie hetamu sadziejničać.
Taksama Łukašenka zajaviŭ, što Biełaruś surjozna rychtujecca da pryjezdu ŭ Minsk kiraŭnika KNR Si Czińpina.
Biełaruś šanuje i hanarycca svaimi adnosinami ź Vialikim Kitajem, padkreśliŭ kiraŭnik dziaržavy. Na jaho dumku, biełaruska-kitajskija adnosiny źjaŭlajucca pakazalnymi i ŭzornymi pa ŭsich napramkach. Na mižnarodnaj arenie punkty hledžańnia dźviuch krain taksama padobnyja, Biełaruś i Kitaj trymajucca adzin adnaho. «My ŭdziačnyja vam za hetuju pazicyju», — padkreśliŭ Łukašenka.
Kiraŭnik dziaržavy zajaviŭ, što Biełaruś aktyŭna padtrymlivaje vyłučanuju kiraŭnictvam Kitaja inicyjatyvu stvareńnia ekanamičnaha pojasa Šaŭkovaha šlachu. «My aktyŭna padtrymlivajem hety kirunak i hatovyja padać našy mahčymaści dla realizacyi hetaha prajekta», — adznačyŭ jon.
Łukašenka taksama adznačyŭ važnaść śviatkavańnia 70-hodździa Vialikaj Pieramohi. Jubilej Pieramohi ŭ hety pieryjad budzie śviatkavać i Kitaj. Biełaruskija i kitajskija delehacyi zmohuć abmianiacca vizitami ŭ hetyja śviatočnyja dni.