Nokia kupić Alcatel za 15 młrd jeŭra
Fota: faltublog.com
Finskaja kampanija Nokia paćvierdziła płany pakupki francuzskaj Alcatel-Lucent, pieradaje Yahoo News.
Pakupka zrobić Nokia adnym z najbujniejšych pastaŭščykoŭ telekamunikacyjnaha abstalavańnia pobač z Ericsson i Huawei.
Pavodle ŭhody, uładalniki Alcatel atrymajuć akcyi abjadnanaj kampanii Nokia Corporation na sumu 15,6 młrd jeŭra («ałkateleŭcy» buduć mieć 33,5% akcyj). Hiendyrektaram kampanii stanie ciapierašni kiraŭnik Nokia Radžyŭ Sury, ale ŭ radu dyrektaraŭ uvojduć try pradstaŭniki Alcatel-Lucent.
Płanujecca, što ŭhoda budzie zakrytaja ŭ 2016 hodzie.
***
U 2013 hodzie Microsoft nabyła za 5,4 młrd jeŭra samuju viadomuju častku Nokia, jaje telefonny biźnies. Telefonny brend Nokia byŭ likvidavany — Microsoft praciahnuła vypusk smartfonaŭ Lumia, ale pad ułasnym brendam. Nokia zachavała ŭsie inšyja padraździaleńni, u liku jakich adkaznaje za vypusk prostych telefonaŭ-«zvaniłak», i navat pasprabavała vypuskać płanšety na Android.