Były kiraŭnik Nacbanka Jermakova: Pabudavała dom pad Minskam, z ranicy hnoj raskidała
Byłaja staršynia praŭleńnia Nacyjanalnaha banka Biełarusi Nadzieja Jermakova nie škaduje pra svajo vyzvaleńnie z pasady ŭ kancy śniežnia 2014 h. Pra heta jana pryznałasia ŭ intervju «Kamsamolskaj praŭdzie ŭ Biełarusi» (kp.by).
«Ja ŭdziačnaja Alaksandru Ryhoraviču, što svoječasova mianie vyzvaliŭ (ad pasady). Ja sama b pasaromiełasia prasicca», — pryznałasia eks-kiraŭnik Nacbanka.
Jak vyśviatlajecca, u volny čas były hałoŭny bankir krainy zajmajecca prysiadzibnaj haspadarkaj.
«Pabudavała dom pad Minskam, siońnia ranicaj raskidvała hnoj, a zaŭtra pačnu ziamlu pierakopvać, kab pasadzić hradki. Parničok rablu nievialiki.
Raniej nie było času hetym zajmacca, i nie było ziamli..», — adznačyła eks-kiraŭnik Nacbanka ŭ intervju kp.by.
«Naša Niva» niekali zrabiła vialiki materyjał pra karjeru Nadziei Jermakovaj.
«Jana vyrasła ŭ chacie biez elektryčnaści, a była kiraŭnicaj Nacbanka»
U pryvatnaści, my adznačali, što ŭ siaredzinie 2000-ch niekalki dziasiatkaŭ upłyvovych čynoŭnikaŭ atrymali prapanovu pabudavać katedžy kala prezidenckaj rezidencyi ŭ Drazdach. Siarod ich akazałasia i Nadzieja Jermakova. Dla bankirki vydzielili 15 sotak u kancy Izumrudnaha zavułka, pobač z tahačasnym staršynioj Kanstytucyjnaha suda Ryhoram Vasilevičam.
Katedž Jermakova zbudavała ścipły, jak dla čałavieka svajho ŭzroŭniu, — płoščaj kala 250 m2. Dla paraŭnańnia, dom inšaha susieda Jermakovaj, Valeryja Mazoŭki (jon uznačalvaŭ trest, jaki zabudoŭvaŭ Drazdy), udvaja bolšy.
Praź niekalki hadoŭ paśla zasialeńnia Nadzieja Jermakova vyrašyła pierapisać svoj katedž na starejšuju dačku.
Na padstavie šlubnaj damovy Natalla Čepikava stała paŭnavartasnaj haspadyniaj doma. … Tady ž, u kancy 2010-ha, Jermakova nabyła sabie dvuchpakajovuju kvateru na vulicy Laŭkova ŭ Minsku.
Ale hałoŭnaje, što, pavodle papieraŭ, jana nie vałodała elitnaj ziamloj.
Tamu padčas razdačy čynoŭnikam nadziełaŭ dla budaŭnictva ŭ staličnym rajonie Viaśninka («Drazdy-2») tahačasnaja kiraŭnica Nacbanka atrymała čarhovyja 15 sotak.
«Jermakovaj dastałasia samaje prestyžnaje miesca — na pieršaj bierahavoj linii vadaschovišča Drazdy, pobač ź minskim meram Mikałajem Ładućkam. Ale kali toj navat nie pačynaŭ budaŭnictva, to Jermakova zmoža zasialicca ŭ novy katedž užo chutka», — adznačali my.
Jak vyhladaje ź intervju kp.by, narešcie katedž dabudavany.