U AAE zmohuć pasadzić za smajlik
Nie kažučy ŭžo pra nieprykrytyja plečy.
Fota z sajta digitalfidelity.info
U novaj apieracyjnaj sistemie Microsoft, Windows 10, źjavicca smajlik, za jaki možna atrymać štraf u Abjadnanych Arabskich Emiratach, paviedamlaje dubajski 7days.
U Windows źjavicca padtrymka smajła z vyciahnutym siarednim palcam — na siońnia mižnarodnym znakam niadobraha staŭleńnia da surazmoŭcy. Taki žest nielehalny ŭ Arabskich Emiratach.
Za pakaz siaredniaha palca (navat virtualnaha) u Arabskich Emiratach mohuć aštrafavać na 500 tysiač dyrcham — bolš za 136 tysiač dalaraŭ. A mohuć i kinuć u turmu na try hady.
Siaredni palec u siabroŭskaj pierapiscy nie pryviadzie da pakarańnia. Ale kali palicyja atrymaje skarhu ad abražanaha, palicyja budzie raźbiracca z chamam pa kryminalnym zakanadaŭstvie.
«Niekatoryja ludzi abražajuć inšych, dumajučy, što nichto nie moža ich pieraśledvać, — kaža advakat Abduła Jusef Al-Nasir. — Ale Emiraty vydali zakon ab kibier-złačynstvach, pa jakim možna karać luboha złačyncu, jaki niekaha abraziŭ z dapamohaj technałohij».
Padtrymka smajła ŭ kadyroŭcy Unicode źjaviłasia jašče ŭ minułym hodzie, ale Apple i Google pakul nie dadali takija smajły ŭ svaje apieracyjnyja sistemy. Što dziŭna, u inšym pradukcie Microsoft, mesendžary Skype, niecenzurnyja smajły zacenzuravali.
Arabskija Emiraty udaskanalvajuć zakony nie tolki ŭ virtualnym śviecie. Naprykład, dres-kod dla turystaŭ ź niadaŭnich časoŭ staŭ bolš žorstkim, pišuć RIA Novosti sa spasyłkaj na emirackija ŚMI. U handlovych centrach turystam razdaduć buklety z tłumačeńniami taho, što ŭ krainie pryniata prykryvać kaleny i plečy, a ŭ kupalnikach znachodzicca tolki na plažach.
Čytajcie taksama: Ministr zamiežnych spraŭ Aŭstralii dała intervju smajlikami