Ministar ekanomiki pryznaje ciažkaści ŭ ekanomicy
Ale tłumačyć ich vyklučna rostam cenaŭ na enerharesursy.
«My sapraŭdy sutyknulisia ŭ pačatku minułaha hodu ź vialikimi ciažkaściami, spravakavanymi ŭ pieršuju čarhu padaražańniem rasiejskich enerhanośbitaŭ» — zajaviŭ na pres‑kanferencyi, pryśviečanaj vynikam sacyjalna‑ekanamičnaha raźvićcia Biełarusi ŭ 2007 hodzie ministar ekanomiki Mikałaj Zajčanka. Adnak, pavodle słovaŭ ministra, ajčynnaja ekanomika ŭ cełym vytrymała hetaje vyprabavańnie — byli zachavanyja tempy ekanamičnaha rostu, u sfery roźničnaha handlu byli adznačanyja peŭnyja pośpiechi, a taksama pavysiŭsia abjom investycyj u asnoŭnyja srodki pramysłovaści.
Ministar adznačyŭ šerah sferaŭ, u jakich nie dasiahnuli zaplanavanych pakazčykaŭ. Heta rentabelnaść vytvorčaści ŭ pramysłovaści, jakaja skłała 13% suprać zaplanavanych 14,5 %; inflacyja — 12,1 % suprać 8 % zaplanavanych (pryrost rublovaj hrašovaj masy ŭ 2007 hodzie skłaŭ 29,2% i tym samym pieravysiŭ vierchniuju miažu prahnozu); admoŭnaje salda ŭ źniešniehandlovych suviaziach — $2685,3 młn (planavałasia dadatnaje salda ŭ miežach $500‑600młn); niedastatkovy rost abjomu sielskahaspadarčaj pradukcyi i adstavańnie ad planaŭ pavieličeńnia abjomu spažyvieckich tavaraŭ, najpierš charčovych. Mikałaj Zajčanka patłumačyŭ, što vializnaje admoŭnaje salda ŭ źniešnim handli vyklikanaje mienavita novaj canoj rasiejskich enerhanośbitaŭ. Asnoŭnymi kryinicami finansavańnia investycyjaŭ u asnoŭny kapitał pa‑raniejšamu zastajucca ŭłasnyja srodki arhanizacyjaŭ i srodki kansalidavanaha biudžetu, što skłali ŭ 2007 h. adpaviedna 41,5 i 25,7 % ad ahulnaha abjomu investycyjaŭ.
U minułym hodzie ŭviedziena ŭ ekspluatacyju 4678 tys.kv.m ahulnaj płoščy žyłych damoŭ, u tym liku ŭ sielskaj miascovaści i małych haradach — 1929 tys.kv.m. Asnoŭnymi krynicami finansavańnia žyllovaha budaŭnictva zastajucca ŭłasnyja srodki nasielnictva — 51,2 % i bankaŭskija kredyty — 39,9 %.
Realnyja hrašovyja prybytki nasielnictva ŭ paraŭnańni z 2006 h. pavialičylisia na 14,7 %. Naminalna naličany siaredniemiesiačny zarobak sa studzienia pa śniežań minułaha hodu skłaŭ 701,1 tys. rub. Realna naličany zarobak pavialičyŭsia na 9,5 %.
Ministar zakranuŭ i temu rehulavańnia cenaŭ. Pavodle jahonych słovaŭ, palityka dziaržaŭnaha rehulavańnia cenaŭ na sacyjalna značnyja tavary budzie praciahvacca, adnak u budučyni ekanomika budzie adychodzić u bok pavyšeńnia doli svabodnych cenaŭ. «Pakul my nie havorym pra niejkuju poŭnuju liberalizacyju cenaŭ» — zajaviŭ jon. Adnak ciaham hodu budzie vypracoŭvacca novy padychod strymlivańnia inflacyi, jaki dazvolić zachavać biasstratnuju vytvorčaść i ŭ toj ža čas nie dapuścić usplosku nieapraŭdanych i spekulatyŭnych cenaŭ na tavary, u pieršuju čarhu charčovyja. Na dumku ministra, najlepšym mechanizmam utrymańnia inflacyi budzie pašyreńnie kankurencyi na ŭnutranym rynku.
Kažučy pra plany pa pryciahnieńni naŭprostavych zamiežnych investycyj u hetym hodzie, ministar adznačyŭ, što ŭrad planuje zabiaśpiečyć prytok zamiežnych investycyj u struktury investycyj u asnoŭny kapitał na ŭzroŭni $1,4 młrd.
Namieśnik ministra ekanomiki Andrej Tur i ministar Mikałaj Zajčanka |