Za hod aficyjnaje biespracoŭje ŭ Biełarusi vyrasła amal udvaja
Pavodle źviestak Ministerstva pracy i sacyjalnaj abarony, kolkaść zarehistravanych biespracoŭnych u Biełarusi na kaniec krasavika skłała 43,4 tysiačy. Heta ŭ 1,9 razu bolš, čym na kaniec krasavika 2014 hoda, i na 11,2% bolš, čym na kaniec sakavika hetaha hoda.
Uzrovień zarehistravanaha biespracoŭja na kaniec krasavika 2015 hoda skłaŭ 1% ad ekanamična aktyŭnaha nasielnictva (na kaniec krasavika 2014 hoda — 0,5%).
Jak paviedamili ŭ Biełstacie, u krasaviku hetaha hoda ŭ ekanomicy byli zaniatyja 4 młn. 445,5 tys. čałaviek, što na 1% mienš, čym u krasaviku 2014-ha. Na pracu ŭ arhanizacyi (biez uliku subjektaŭ małoha pradprymalnictva) było pryniata 53,1 tys. čałaviek (1,7% siaredniamiesiačnaj kolkaści pracoŭnych), u tym liku na dadatkova ŭviedzienyja pracoŭnyja miescy — 4,1 tys. čałaviek, abo 7,8% ad ahulnaj kolkaści pryniatych.
Za hety ž pieryjad z-za roznych pryčyn było zvolniena 71,2 tys. čałaviek (2,3% siaredniamiesiačnaj kolkaści). Ź ich 4,9% pazbavilisia pracoŭnych miescaŭ za prahuł i inšyja parušeńni pracoŭnaj dyscypliny, 1,4% — u suviazi sa skaračeńniem kolkaści abo štatu rabotnikaŭ, a taksama likvidacyjaj arhanizacyj.
Kaeficyjent zamiaščeńnia rabotnikaŭ (adnosiny kolkaści pryniatych da liku zvolnienych) u krasaviku 2015 hoda skłaŭ 0,745 (u krasaviku 2014 hoda — 0,774).
Značny rost aficyjnaha biespracoŭja ekśpierty źviazvajuć z dekretam № 3 «Ab papiaredžańni sacyjalnaha ŭtrymanstva» (dekret ab «darmajedstvie»). Nahadajem, dakumient byŭ padpisany 2 krasavika «ŭ metach stymulavańnia pracazdolnych hramadzian da pracoŭnaj dziejnaści i zabieśpiačeńnia vykanańnia imi kanstytucyjnaha abaviazku pa ŭdziele ŭ finansavańni dziaržaŭnych raschodaŭ». Zhodna z dekretam hramadzianie Biełarusi, a taksama inšaziemcy i asoby biez hramadzianstva, jakija pastajanna žyvuć u respublicy i nie biaruć udzieł u finansavańni dziaržraschodaŭ abo ŭdzielničajuć u takim finansavańni mienš za 183 kalandarnyja dni na hod, pavinny vypłačvać zbor u 20 bazavych vieličyniaŭ (siońnia heta 3 młn. 600 tys. rubloŭ).
Źviestki dziaržaŭnaj słužby zaniataści śviedčać pra toje, što kaeficyjent sacyjalnaj napružanaści na rynku pracy Biełarusi vyras u čatyry razy ŭ paraŭnańni ź minułym hodam: z 0,4 biespracoŭnaha na adnu vakansiju na 1 maja 2014 hoda da 1,7 — na 1 maja hetaha. Pavodle acenki śpiecyjalistaŭ, sioleta situacyja na rynku pracy Biełarusi charaktaryzujecca źnižeńniem popytu na pracoŭnuju siłu, pavieličeńniem zvarotaŭ u słužbu zaniataści i rehistracyi biespracoŭnych, a taksama rostam napružanaści na rynku pracy ŭ rehijonach.