«Chionde» vypuścić pieršy aŭtamabil na Android
«OK, Google, jak tam na majoj «Sanacie» akumulatar pažyvaje?»
Pieršaj mašynaj z apieracyjnaj sistemaj Android Auto stanie Hyundai Sonata 2015 hoda, paviedamlaje Automative News.
Užo ŭ 2015 hodzie Android Auto źjavicca na inšych madelach «Chionde», a taksama na mašynach «Ford», «Dženierał Motars», «Chonda» i «Folksvahien». Dla vykarystańnia hetaj sistemy praz telefon spatrebicca smartfon na Android 5.0 ci naviejšaj viersii.
Bartavym kampjutaram na Android možna kiravać i z tačskryna ŭ mašynie albo praz knopki na ruli. Akramia standartnych funkcyj bartavoha kampjutara, Android Auto pry ŭmovie padklučeńnia smartfona ŭ admysłovy słot na prybornaj paneli pradstavić hałasavy pošuk Google, navihacyju praz Google Maps, začytvańnie paviedamleńniaŭ i adkaz na ich praz raspaznavańnie hołasam, telefanavańni pa hučnaj suviazi, a taksama kiravańnie raznastajnymi funkcyjami svajho telefona praz hołas ci knopki na ruli.
Android Auto užo siońnia možna ŭstalavać na mnohija aŭtamabili, dakupiŭšy asobnuju pryładu firmy Pioneer ci jaje kitajskich kankurentaŭ.
Što da «Sanaty», to jana budzie kaštavać u ZŠA 27,45 tysiač dalaraŭ z Android Auto (i pastaŭlacca z 8-calevym tačskrynam na prybornaj paneli) suprać zvyčajnych 22 tysiač. Tyja, chto ŭžo nabyŭ «Sanatu» 2015 hoda, zmohuć atrymać biaspłatnaje abnaŭleńnie apieracyjnaj sistemy bartavoha kampjutara da Android Auto.
Apple, hałoŭny kankurent Google na mabilnym rynku, taksama maje svaju aŭtamabilnuju sistemu — CarPlay. U chutkim časie mašyny ź joj majuć źjavicca ŭ bolšaści hihantaŭ aŭtapramu.
Google pracuje i nad ułasnymi bieśpiłotnymi aŭto. Chodziać čutki, što anałahičny prajekt maje Apple.