Arhkamitet Chryścijanskaj demakratyi padajecca ŭ Knihu rekordaŭ Hinesa: łukašenkaŭcy admaŭlali partyi ŭ rehistracyi rekordnuju kolkaść razoŭ
Arhkamitet pa stvareńni partyi «Biełaruskaja chryścijanskaja demakratyja» źbiraje nieabchodnyja dakumienty dla padačy zajaŭki ŭ Knihu rekordaŭ Hinesa ŭ katehoryi «Samaja vialikaja kolkaść admoŭ u rehistracyi partyi», paviedamlaje pres-słužba arhanizacyi.
Pradstaŭnikoŭ Knihi rekordaŭ Hinesa płanujecca taksama zaprasić na ŭstanoŭčy źjezd BCHD 13 červienia. Arhanizacyja takim čynam choča pryciahnuć uvahu da prablemy nierehistracyi palityčnych partyj i hramadskich arhanizacyj u Biełarusi. Tak, apošniaja partyja ŭ Biełarusi była zarehistravanaja ŭ 2000 hodzie.
«Niemahčymaść zarehistravać partyju ci hramadskaje abjadnańnie — adno z hałoŭnych parušeńniaŭ hramadskich svabod u Biełarusi, — adznačyŭ sustaršynia BCHD Hieorhij Dźmitruk. — Rehistracyja partyi — heta jak vydača paśviedčańnia pra naradžeńnie čałavieka, pryznańnie taho, što takaja partyja isnuje. A što ź joj budzie dalej, pakaža čas. Ale dziaržava zamiest taho kab zarehistravać BCHD, pastupaje niespraviadliva, niedemakratyčna i niełahična. Utvareńnie partyi BCHD — fakt, pryznany ŭsimi, akramia ŭład Biełarusi. Nastaŭ čas pieraadoleć strachi, spravicca z fobijami i pieravieści ŭzajemadziejańnie z BCHD u narmalnaje rečyšča ŭ miežach zakona».
Jak raniej paviedamlałasia, arhkamitet padavaŭ zajaŭki na arendu pamiaškańnia dla źjezda ŭ 13 arhanizacyj, adnak usie admovili. U vyniku ŭ Minharvykankam była padadzienaja zajaŭka na praviadzieńnie ŭstanoŭčaha źjezda na płoščy Svabody ŭ Minsku.
Heta ŭžo piataja sproba zarehistravać BCHD. Pieršy ŭstanoŭčy źjezd prajšoŭ u 2009 hodzie, u 2010-m — jašče dva. Apošniaja sproba rehistracyi była zroblenaja ŭ śniežni 2011 hoda.