Foty Ihara Pcičkina paśla śmierci ŭ SIZA i za 4 dni da śmierci: sprava nakiravana na novy razhlad
Žanna Pcičkina atrymała adkaz z Hienieralnaj prakuratury na svaju skarhu ab spynieńni kryminalnaj spravy pa fakcie śmierci jaje syna Ihara Pcičkina ŭ SIZA-1, paviedamlaje spring96.org.
U adkazie paznačana, što Pastanova ab spynieńni kryminalnaj spravy ad 2014/12/29 admieniena i sprava znoŭ nakiravana ŭ Śledčy kamitet Respubliki Biełaruś na novy razhlad. Akramia taho, u Śledčy kamitet taksama pieradadzienyja dadatkovyja materyjały, pradastaŭlenyja Žannaj Pcičkinaj, dla aznajamleńnia i dałučeńnia ich da spravy. Siarod ich i fota Ihara Pcičkina ŭ momant pastupleńnia ŭ Śledčy izalatar i praz 4 dni, užo paśla śmierci.
Foty Pcičkina za 4 dni da śmierci i paśla śmierci.
Zdajecca, heta zusim roznyja ludzi. Ci jak minimum — čałaviek u značna adroznyja časovyja pieryjady. Na samoj spravie — nie. Pamiž zdymkami — 4 dni. Na pieršym fota: tak vyhladaŭ Ihar Pcičkin, kali pastupiŭ u SIZA na Vaładarskaha. Druhoje fota: takim jon pakinuŭ SIZA praz 4 dni.
I chacia maci Ihara zabaroniena pad stracham kryminalnaj adkaznaści raspaviadać, ad jakich dziejańniaŭ słužbovych asobaŭ SIZA adbyłosia toje, što adbyłosia, časam fota havorać krasamoŭniej za ŭsialakija słovy.
***
Ihar Pcičkin pamior u SIZA 4 žniŭnia 2013 ad spynieńnia serca, pryčyny jakoho nie vyśvietleny. Blizkija niabožčyka dumajuć, što śmierć nastupiła ŭ vyniku źbićcia Ihara achoŭnikami izalatara, bo na jaho ciele było mnostva siniakoŭ.