Twitter źmienić hiendyrektara i limit na kolkaść znakaŭ u paviedamleńniach
Ci źviazanyja hetyja padziei, nieviadoma.
Džek Dorsi, časovy hiendyrektar Twitter ź lipienia. Fota: Art Streiber
Hiendyrektar Twitter Dyk Kastoła pakinie svaju pasadu z 1 lipienia, paviedamlaje kampanija. Jaho miesca prynamsi časova zojmie zasnavalnik i pieršy hiendyrektar sacsietki Džek Dorsi, sam Kastoła zastaniecca ŭ radzie dyrektaroŭ.
Na dumku Wall Street Journal, kiraŭnictva Twitter znachodziłasia pad ciskam inviestaraŭ praź nizkija tempy rostu.
Za apošni hod štomiesiačnaja naviedvalnaść sacsietki vyrasła na 18%, ale vyručka za pieršy kvartał 2015 hoda była nižej za čakanyja pakaźniki (čystyja straty skłali 162 młn dalaraŭ). Paśla abviaščeńnia ab źmienie hiendyrektara akcyi Twitter padskočyli z 35,83 da 39,29 dalaraŭ.
Novaha hiendyrektara budzie šukać kamitet rady dyrektaroŭ. Dorsi, jaki časova vierniecca na pasadu hiendyrektara, budzie vymušany sumiaščać Twitter z pracaj nad ułasnaj płaciožnaj sistemaj Square. Jak padkreśliŭ Kastoła, Dorsi — aptymalny hiendyrektar dla «pierachodnaha pieryjadu».
Twitter praktyčna zdymie abmiežavańnie na kolkaść znakaŭ u pryvatnych paviedamleńniach — zamiest 140 znakaŭ ciapier možna adsyłać da 10 tysiač znakaŭ za raz.
Pamier ułasna tvitaŭ nie źmienicca.
Źmieny nabuduć siłu taksama ź lipienia. Ci źviazanyja jany sa źmienaj kiraŭnictva, nieviadoma. Ab płanach kštałtu stvareńnia asobnaha mesendžara (jak to zrabiŭ Facebook) Twitter pakul nie zajaŭlaŭ.
***
Twitter byŭ zasnavany (pad nazvaj twttr) Džekam Dorsi ŭ 2006 hodzie jak servis publikacyi tekstavych statusaŭ. Ź ciaham času jon razrośsia da sacsietki z fota i videa, aficyjnymi staronkami akcioraŭ, palitykaŭ i muzykaŭ. Na siońnia Twitter maje 300 młn aktyŭnych karystalnikaŭ štomiesiac, jany publikujuć 500 młn tvitaŭ na dzień.