Nakolki dobry «Dobry rovar»? Test-drajv biaspłatnaha viełaprakatu
Sam rovar vydatny, ale ŭ sistemie jość niedachopy.
Uviesnu ŭ Minsku byŭ anansavany bajkkrosinh «Dobry rovar». Vałanciory raźmiaścili pa horadzie stajanki, na jakich možna ŭziać na dzień rovar — absalutna biaspłatna pry ŭmovie rehistracyi na sajcie. Servis pačaŭ pracu 10 červienia.
«Naša Niva» praviała test sistemy, ale «zavisła» na samym pieršym etapie. Jak karystacca «Dobrym rovaram»? Davoli prosta, kali viedać pra «padvodny kamień».
Dla taho, kab uziać naprakat adzin z «dobrych rovaraŭ», treba zarehistravacca na sajcie dobrovar.by. Praces stvareńnia akaŭntu zvyčajny: łahin-parol-imia-avatarka.
Kab akaŭntu dali dostup da arendy rovaraŭ, treba dasłać imia karystalnika i skan albo fota apošniaj staronki pašparta na adras reg.bikecrossing@gmail.com.
Na apracoŭku rehistracyi sydzie da 24 hadzin, papiaredžvajuć na sajcie. Prablema ŭ tym, što pa zaviaršeńni apracoŭki nijakoha paviedamleńnia na poštu nie pryjšło.
Jak vyjaviłasia, akaŭntu paśpiachova dali dostup da arendavańnia rovaraŭ. Ale prynamsi pakul pryjdziecca na ŭsialaki vypadak praviarać samastojna, ci adbyłosia heta.
U astatnim pa zaviaršeńni rehistracyi praces lohki. Na sajcie dobrovar.by pa parkoŭkach ci «imionach» rovaraŭ šukajecie najzručniejšy vam varyjant. Na siońnia pa Minsku 20 parkovak, na jakich dastupnyja 25 rovaraŭ roznych kłasaŭ. Na žal, karty parkovak na sajcie nie pakazvajuć — tolki śpis z adrasami.
Kožny rovar maje svajo «imia» i ŭnikalnuju rasfarboŭku. «Alhierd», «Marsupiłami», «Pluščyk», «Srebny viek ruskaj paezii», «Šabany»… «Naša Niva» abrała viasioleńki «Pol».
Pa vybary rovara vam pakažuć kod na zamku i čas, da jakoha dajuć rovar. Heta lepiej na ŭsialaki vypadak zapisać ci źniać skrynšot ekranu. Pravierana: kod padychodzić!
Nie zabyvajcie raspaviadać siabram pra servis — jon taho varty!
Sam rovar choć i nie idealna novy, ale ŭ dastatkova dobrym stanie. Kali nie ŭličvać pašarpany rul i praciortaje siadło, na takim možna i na tancy. Tym bolš aryhinalnaja afarboŭka tamu spryjaje.
Naš «Pol» dobra pakazaŭ siabie na darozie: koły jak śled napampavanyja, tarmazy tarmaziać, pieradačy pieraklučajucca, siadło lohka i biez dadatkovych instrumientaŭ padymajecca na zručnuju vyšyniu, a piaredniaja zoračka prykrytaja płastykavaj nakładkaj, kab nie zapeckalisia nahavicy.
Viadoma, ad biaspłatnaha rovara nie varta čakać bartavoha kampjutara, lichtaryka ci trymalnika dla telefonaŭ. Ale na «Poli», jak i na niekatorych inšych rovarach, niama bahažnika, a koły nie prykrytyja kryłami. Kali dla vas pryncypova toje ci inšaje, uvažliva hladzicie na fota rovara na sajcie.
Źviarnicie ŭvahu na toje, kali vam treba viarnuć rovar — ich dajuć nie na 24 hadziny, a da kanca dnia. Viartać rovary možna na lubuju sa stajanak, paznačanych na sajcie.
Viarnuli, pastavili na zamok — nie zabudźciesia paznačyć na sajcie, na jakoj stajancy pakinuli rovar!
Za nieviartańnie, paškodžańnie ci niepaznačeńnie viartańnia atrymalnik rovara niasie poŭnuju (administracyjnuju, a kali pastaracca, i kryminalnuju) adkaznaść. «Naša Niva» nie stała praviarać, jak heta pracuje.
Ahulnyja ŭražańni ad servisu dobryja, niahledziačy na zatrymku z rehistracyjaj. Na samoj spravie dobry rovar dajuć na vyhadnych umovach — ci heta nie pryčyna pasprabavać pierasieści na rovar, a pasprabavaŭšy, i padumać ab pakupcy ŭłasnaha?
Kali ž vam spadabaŭsia prajekt, jamu možna dapamahčy ŭłasnym udziełam, finansami ci resursami. Pa hetym pytańni možna pisać na org.bikecrossing@gmail.com.
P.S. Kali vy nie ŭpeŭnienyja ŭ praviłach darožnaha ruchu i inšych aśpiektach karystańnia rovaram, pračytajcie «Dapamožnik ravarysta». Hetamu prajektu, darečy, taksama možna dapamahčy paradami i ŭłasnym udziełam.